اسلام آباد، پاکستان نے امریکہ اور ایران کے درمیان دو ہفتے پر مشتمل نازک جنگ بندی کے قیام میں اہم سفارتی کردار ادا کیا ہے۔ غیر ملکی میڈیا رپورٹس کے مطابق جنگ بندی کے اعلان سے چند گھنٹے قبل بھی پاکستان کی جانب سے رابطے اور مذاکرات جاری رہے جن میں فریقین کے درمیان پیغامات کے تبادلے کا کام کیا گیا۔
ذرائع کے مطابق پاکستان کی طرف سے یہ مذاکرات ایک محدود اور انتہائی حساس حلقے کے ذریعے انجام دیے گئے، جہاں ماحول سنجیدہ مگر پرامید تھا کہ جلد کشیدگی میں کمی ممکن ہو سکے گی۔ پاکستان نے اس پورے عمل میں بطور ثالث کردار ادا کرتے ہوئے امریکہ اور ایران کے درمیان رابطہ کاری جاری رکھی۔
پاکستان اور ایران کے درمیان تاریخی، جغرافیائی اور سفارتی تعلقات ہیں، دونوں ممالک کی طویل سرحد بھی مشترک ہے جبکہ پاکستان اکثر ایران کو اپنا برادر ملک قرار دیتا ہے۔ اسی طرح امریکہ کے ساتھ بھی پاکستان کے تعلقات میں سفارتی رابطے موجود رہے ہیں، جن میں اعلیٰ عسکری اور سیاسی سطح پر بات چیت شامل رہی ہے۔
رپورٹس کے مطابق اس عمل نے خطے میں کشیدگی کم کرنے اور فریقین کے درمیان عارضی جنگ بندی کے قیام میں اہم کردار ادا کیا، جسے علاقائی سفارت کاری کی ایک بڑی کامیابی قرار دیا جا رہا ہے۔