خلیجی کشیدگی کے دوران گوادر پھر عالمی توجہ کا مرکز، کیا پاکستان اس بار موقع سے فائدہ اٹھا پائے گا؟

خلیجی خطے میں حالیہ جغرافیائی و سیاسی کشیدگی اور امریکہ کی قیادت میں ہونے والی پیش رفت نے ایک بار پھر گوادر کو عالمی توجہ کا مرکز بنا دیا ہے، جس کے بعد یہ سوال شدت سے اٹھ رہا ہے کہ آیا پاکستان اس موقع کو مستقل معاشی اور اسٹریٹجک فائدے میں بدل سکے گا یا ماضی کی طرح ایک اور سنہری موقع ضائع ہو جائے گا۔ 1958 میں عمان سے حاصل کیا جانے والا گوادر آج پاکستان کے لیے نہ صرف ایک اہم بحری دفاعی اثاثہ سمجھا جاتا ہے بلکہ مستقبل کے معاشی گیٹ وے کے طور پر بھی دیکھا جا رہا ہے، جو مشرقِ وسطیٰ، وسطی ایشیا اور چین کو آپس میں جوڑنے کی صلاحیت رکھتا ہے۔ ماہرین کے مطابق بندرگاہ، ایئرپورٹ توسیع اور سیکیورٹی انفراسٹرکچر پر کام جاری ہے، تاہم شہری گوادر اب بھی زمین کے تنازعات، کمزور انتظامی ڈھانچے، بنیادی سہولیات کی کمی اور سرمایہ کاروں کے عدم اعتماد جیسے مسائل کا شکار ہے۔ تجزیہ کاروں کا کہنا ہے کہ شفاف پالیسی، زمینوں کا ڈیجیٹل ریکارڈ اور مؤثر حکومتی نگرانی گوادر کی ترقی کے لیے ناگزیر ہیں۔