یورپی یونین کی اعلیٰ نمائندہ برائے خارجہ امور و سیکیورٹی پالیسی اور نائب صدر کاجا کالاس آج پاکستان کا دورہ کریں گی، جہاں وہ پاکستان اور یورپی یونین کے درمیان آٹھویں اسٹریٹجک ڈائیلاگ میں شرکت کریں گی۔ دفتر خارجہ کے مطابق اس اہم اجلاس کے دوران دونوں فریقین باہمی تعلقات، اقتصادی تعاون، سفارتی روابط، تجارت، علاقائی استحکام اور مختلف شعبوں میں جاری شراکت داری کا تفصیلی جائزہ لیں گے۔
پاکستان اور یورپی یونین کے درمیان اسٹریٹجک ڈائیلاگ دونوں فریقوں کے مابین اعلیٰ ترین ادارہ جاتی رابطہ تصور کیا جاتا ہے، جس کے ذریعے 2019 میں طے پانے والے پاکستان۔یورپی یونین اسٹریٹجک انگیجمنٹ پلان کے تحت مختلف شعبوں میں تعاون کا جائزہ لیا جاتا ہے۔ یہ مذاکرات ہر سال منعقد کیے جاتے ہیں جبکہ گزشتہ اجلاس نومبر 2025 میں اسلام آباد میں منعقد ہوا تھا۔
کاجا کالاس اپنے دورے کے دوران نائب وزیر اعظم و وزیر خارجہ اسحاق ڈار کے ہمراہ آٹھویں اسٹریٹجک ڈائیلاگ کی مشترکہ صدارت کریں گی۔ یورپی یونین کی سفارتی سروس کے مطابق وہ صدر آصف علی زرداری، وزیر اعظم شہباز شریف اور چیف آف ڈیفنس فورسز فیلڈ مارشل عاصم منیر سے بھی ملاقات کریں گی، جہاں دوطرفہ تعلقات، خطے کی صورتحال اور تعاون کے فروغ پر تبادلہ خیال کیا جائے گا۔
اس دورے کے دوران کاجا کالاس تھنک ٹینکس اور تعلیمی شعبے سے وابستہ نمائندوں سے بھی ملاقات کریں گی۔ پاکستان یورپی یونین کو اپنے اہم تجارتی شراکت داروں میں شمار کرتا ہے، جبکہ جی ایس پی پلس اسکیم کے تحت پاکستان کی 30 فیصد سے زائد برآمدات کو یورپی منڈی تک ڈیوٹی فری رسائی حاصل ہے۔ مبصرین کے مطابق یہ دورہ پاکستان اور یورپی یونین کے تعلقات کو مزید مضبوط بنانے میں اہم کردار ادا کر سکتا ہے۔