سندھ و بلوچستان میں اسکول یکم اپریل سے کھلیں گے، پانچ روزہ ہفتہ نافذ

کراچی/کوئٹہ: سندھ اور بلوچستان میں تمام سرکاری و نجی تعلیمی ادارے یکم اپریل سے دوبارہ کھولنے کا فیصلہ کیا گیا ہے، جبکہ ایندھن بحران کے باعث پانچ روزہ تعلیمی ہفتہ نافذ کیا جائے گا۔

بلوچستان حکومت کے جاری کردہ نوٹیفکیشن کے مطابق 10 مارچ سے 31 مارچ تک بند رہنے والے اسکولز اب بدھ سے باقاعدہ کلاسز کا آغاز کریں گے۔ تاہم موجودہ صورتحال کے پیش نظر پیر سے جمعہ تک تعلیمی سرگرمیاں جاری رہیں گی جبکہ ہفتہ اور اتوار کو تعطیل ہوگی۔

حکام نے واضح کیا ہے کہ امتحانات اور اسیسمنٹس پہلے سے جاری شیڈول کے مطابق ہی ہوں گے اور اس میں کوئی تبدیلی نہیں کی جائے گی، جبکہ متعلقہ اداروں کو ہدایات جاری کی گئی ہیں کہ فیصلے پر سختی سے عملدرآمد یقینی بنایا جائے۔

سندھ میں بھی اسی طرز پر تعلیمی اداروں کی بحالی کا اعلان کیا گیا ہے، جس کا مقصد ایندھن بحران کے اثرات کو کم کرتے ہوئے تعلیمی سرگرمیوں کو بحال رکھنا ہے۔