بلوچستان حکومت نے نوجوانوں کو روزگار کے بہتر مواقع فراہم کرنے کیلئے صنعت کی ضروریات سے ہم آہنگ فنی تربیتی پروگراموں کو فروغ دینے پر زور دیا ہے۔
بلوچستان کے محکمہ محنت و افرادی قوت کے سیکریٹری صالح محمد ناصر نے کوئٹہ چیمبر آف کامرس اینڈ انڈسٹری میں مشاورتی اجلاس سے خطاب کرتے ہوئے کہا کہ سرکاری اداروں، کاروباری شعبے اور فنی تربیتی اداروں کے درمیان مؤثر رابطہ ضروری ہے تاکہ نوجوانوں کو مارکیٹ کی طلب کے مطابق مہارتیں فراہم کی جا سکیں۔
اجلاس میں چیمبر آف کامرس، نیشنل ووکیشنل اینڈ ٹیکنیکل ٹریننگ کمیشن، بلوچستان ٹیکنیکل ایجوکیشن اینڈ ووکیشنل ٹریننگ اتھارٹی، بیورو آف امیگریشن اینڈ اوورسیز ایمپلائمنٹ اور نجی شعبے کے نمائندگان نے شرکت کی۔
شرکا نے اس بات پر زور دیا کہ فنی تعلیم کو صنعتوں کی حقیقی ضروریات کے مطابق ترتیب دیا جائے تاکہ ہنر مند افرادی قوت تیار ہو سکے اور صوبے میں روزگار کے مواقع پیدا ہوں۔
اجلاس میں سرمایہ کاروں کو سہولت فراہم کرنے کیلئے ون ونڈو نظام قائم کرنے کی ضرورت پر بھی زور دیا گیا، جس سے کاروباری سرگرمیوں میں آسانی پیدا ہو گی اور صنعتی شعبے کی ترقی کو فروغ ملے گا۔
کوئٹہ چیمبر کے نائب صدر میر وائس خان کاکڑ نے کہا کہ بلوچستان کے قدرتی وسائل سے مکمل فائدہ اٹھانے کیلئے حکومت کو کاروبار دوست ماحول فراہم کرنا ہوگا۔
شرکا کے مطابق صنعت سے منسلک تربیتی نظام صوبے کے نوجوانوں کو مقامی اور عالمی روزگار مارکیٹ میں بہتر مواقع فراہم کرنے میں اہم کردار ادا کر سکتا ہے۔