کوئٹہ، 15 اپریل (ویب ڈیسک): حکومت بلوچستان نے صوبے بھر میں امن و امان کی صورتحال بہتر بنانے کے لیے کرایہ داروں کی رجسٹریشن کو لازمی قرار دے دیا ہے۔
تفصیلات کے مطابق ایک اعلیٰ سطحی اجلاس میں فیصلہ کیا گیا کہ اب کوئی بھی شخص شناختی کارڈ کے بغیر مکان کرائے پر حاصل نہیں کر سکے گا۔
وزیرِ اعلیٰ کے معاون برائے داخلہ بابر خان یوسفزئی نے تصدیق کی ہے کہ نئے قوانین کے تحت مالکانِ جائیداد پر لازم ہوگا کہ وہ کرایہ داروں کے قومی شناختی کارڈ کی تصدیق کریں اور انہیں مقامی پولیس کے پاس رجسٹر کرائیں۔
بلوچستان ریسٹرکشن آف رینٹڈ بلڈنگز (سیکیورٹی) ایکٹ کے تحت ہدایت کی گئی ہے کہ 24 گھنٹے سے زائد قیام کرنے والے مہمانوں کی اطلاع بھی متعلقہ تھانے کو دی جائے۔
حکام نے ہاسٹلز، ہوٹلز اور دیگر کرایہ داری مراکز کے منتظمین کو بھی رہائشیوں کا مکمل ریکارڈ رکھنے کی ہدایت کی ہے۔
انتظامیہ نے واضح کیا ہے کہ خلاف ورزی کی صورت میں سخت قانونی کارروائی کی جائے گی، جس میں مقدمات کا اندراج اور جائیداد سیل کرنے جیسے اقدامات شامل ہو سکتے ہیں۔
حکام کے مطابق یہ اقدامات مشکوک سرگرمیوں کی روک تھام اور مجموعی سیکیورٹی بہتر بنانے کے لیے کیے جا رہے ہیں۔