محکمہ ثانوی تعلیم بلوچستان نے صوبے کے ونٹر زون میں واقع سرکاری اور نجی اسکولوں کے لیے مختصر موسم گرما کی تعطیلات کا اعلان کر دیا ہے، جس کے تحت تمام تعلیمی ادارے 18 جولائی سے 2 اگست 2026 تک بند رہیں گے
محکمہ کی جانب سے جاری کردہ نوٹیفکیشن کے مطابق ونٹر زون کے تمام سرکاری و نجی اسکولوں میں تعطیلات کا اطلاق ہوگا جبکہ موسم گرما اور موسم سرما دونوں زونز میں تدریسی و تعلیمی سرگرمیاں پیر 3 اگست 2026 سے معمول کے مطابق دوبارہ شروع کر دی جائیں گی
محکمہ ثانوی تعلیم نے ڈویژنل ڈائریکٹرز، ضلعی تعلیمی افسران، اسکول سربراہان اور متعلقہ انتظامی حکام کو ہدایت کی ہے کہ تعطیلات کے شیڈول پر سختی سے عملدرآمد یقینی بنایا جائے اور کلاسز کے بروقت آغاز کے لیے تمام ضروری انتظامات مکمل کیے جائیں
نوٹیفکیشن میں والدین، اساتذہ اور طلبہ سے بھی اپیل کی گئی ہے کہ وہ اعلان کردہ تعطیلاتی شیڈول کے مطابق اپنی تعلیمی سرگرمیوں کی منصوبہ بندی کریں تاکہ نئے تعلیمی سیشن کا آغاز منظم اور مؤثر انداز میں کیا جا سکے
محکمہ حکام کے مطابق تعطیلات کا فیصلہ طلبہ اور اساتذہ کو موسمی حالات کے پیش نظر مناسب وقفہ فراہم کرنے اور تعلیمی نظام کو بہتر انداز میں جاری رکھنے کے لیے کیا گیا ہے