بلوچستان میں لکڑی کی ترسیل پر 90 روزہ پابندی – غیر قانونی کٹائی اور اسمگلنگ کے خلاف بڑا کریک ڈاؤن

کوئٹہ: حکومت بلوچستان نے جنگلات کے تحفظ اور غیر قانونی لکڑی کی کٹائی و اسمگلنگ کی روک تھام کے لیے صوبے بھر میں لکڑی، ٹمبر اور جنگلاتی مصنوعات کی نقل و حمل، ترسیل اور سپلائی پر 90 روز کے لیے پابندی عائد کر دی ہے۔ محکمہ داخلہ بلوچستان کی جانب سے جاری نوٹیفکیشن کے مطابق یہ پابندی ضابطہ فوجداری کی دفعہ 144 کے تحت فوری طور پر نافذ العمل ہو گئی ہے اور تمام اضلاع میں اس کا اطلاق ہوگا۔ اضافی چیف سیکرٹری داخلہ حمزہ شفقات نے کہا کہ یہ فیصلہ عوامی مفاد میں قدرتی وسائل کے تحفظ اور جنگلاتی ذخائر کے غیر قانونی استعمال کو روکنے کے لیے کیا گیا ہے۔ انہوں نے کہا کہ ڈپٹی کمشنرز، اسسٹنٹ کمشنرز، پولیس، فرنٹیئر کور اور دیگر قانون نافذ کرنے والے اداروں کو ہدایت دی گئی ہے کہ وہ ٹمبر یا لکڑی لے جانے والی ہر گاڑی کو روکنے، قبضے میں لینے اور خلاف ورزی کی صورت میں قانونی کارروائی کے مجاز ہوں گے۔ حکام کے مطابق خلاف ورزی کرنے والوں کے خلاف تعزیرات پاکستان کی دفعہ 188 کے تحت کارروائی کی جائے گی۔ نوٹیفکیشن میں واضح کیا گیا ہے کہ اس پابندی کے دوران کسی بھی قسم کا پرمٹ یا اجازت نامہ قابل قبول نہیں ہوگا، سوائے ان خصوصی صورتوں کے جن کی منظوری محکمہ داخلہ تحریری طور پر دے گا۔ حکومت نے اس اقدام کو ماحولیاتی تحفظ اور جنگلاتی وسائل کے پائیدار استعمال کے لیے اہم قدم قرار دیا ہے۔