پاکستان اور قازقستان نے اپنی اسٹریٹجک شراکت داری کو مزید مستحکم بنانے کے عزم کا اعادہ کیا ہے۔ یہ عزم قازقستان کے وزیر خارجہ یرمک کوشیربایف اور پاکستان کے سفیر نعمان بشیر بھٹی کے درمیان ملاقات کے دوران سامنے آیا، جو قازقستان میں اپنی سفارتی ذمہ داریاں مکمل کر رہے ہیں۔
قازق وزارت خارجہ کے مطابق ملاقات میں دونوں ممالک کے درمیان دوطرفہ تعلقات، تعاون کے موجودہ امور اور مستقبل کے امکانات پر تبادلہ خیال کیا گیا۔ قازق وزیر خارجہ نے پاکستان اور قازقستان کے درمیان تعاون کی موجودہ سطح کو سراہتے ہوئے کہا کہ آستانہ اسلام آباد کے ساتھ دوطرفہ روابط اور تعمیری مذاکرات کو مزید وسعت دینے کے لیے پرعزم ہے۔
یرمک کوشیربایف نے رواں سال فروری میں قازقستان کے صدر قاسم جومارت توکایف کے دورہ پاکستان کو اہم سنگ میل قرار دیا، جس کے دوران دونوں ممالک کے تعلقات کو اسٹریٹجک شراکت داری کی سطح تک بڑھایا گیا تھا۔
ملاقات کے دوران پاکستانی سفیر نعمان بشیر بھٹی نے اپنے سفارتی دور میں قازق حکومت کی جانب سے فراہم کردہ تعاون پر اظہار تشکر کیا۔ انہوں نے کہا کہ پاکستان آستانہ کے ساتھ تعمیری مکالمے اور باہمی تعاون کو مزید فروغ دینے کے لیے تیار ہے۔
قازق وزارت خارجہ نے بتایا کہ ملاقات کے اختتام پر وزیر خارجہ یرمک کوشیربایف نے پاکستانی سفیر کو دونوں ممالک کے تعلقات کو مضبوط بنانے میں ان کی خدمات کے اعتراف میں قازقستان کی وزارت خارجہ کا اعزازی سرٹیفکیٹ پیش کیا۔
پاکستان اور قازقستان کے درمیان سیاسی، تجارتی، اقتصادی، توانائی، علاقائی رابطوں اور عوامی سطح پر روابط کے شعبوں میں تعاون بڑھ رہا ہے۔ دونوں ممالک وسطی ایشیا اور جنوبی ایشیا کے درمیان روابط کے فروغ کے لیے بھی مشترکہ اقدامات پر کام کر رہے ہیں۔
دونوں ممالک نے اس عزم کا اظہار کیا کہ مستقبل میں بھی اعلیٰ سطحی روابط، سفارتی مشاورت اور باہمی مفاد پر مبنی منصوبوں کے ذریعے دوطرفہ تعلقات کو مزید مضبوط بنایا جائے گا۔