پاکستان نے اسٹریٹ آف ہرمز میں بحری آمدورفت کی جلد بحالی کا مطالبہ کرتے ہوئے کہا ہے کہ یہ آبی گزرگاہ عالمی تجارت اور توانائی کی ترسیل کے لیے انتہائی اہم ہے۔ دفتر خارجہ کے مطابق پاکستان خطے میں کشیدگی میں کمی اور جنگ بندی کے لیے مسلسل سفارتی رابطے کر رہا ہے، جبکہ واشنگٹن اور تہران کے درمیان بات چیت میں سہولت کاری بھی جاری ہے۔
ترجمان دفتر خارجہ طاہر اندرابی نے ہفتہ وار بریفنگ میں کہا کہ مذاکراتی عمل جاری ہے اور پاکستان کا مؤقف ہے کہ مسائل کا حل صرف سفارت کاری اور بات چیت کے ذریعے ممکن ہے۔ انہوں نے بتایا کہ حالیہ جنگ بندی معاہدوں نے مزید کشیدگی کو روکنے اور شہری جانی نقصان کم کرنے میں مدد دی ہے۔
ترجمان کے مطابق اسٹریٹ آف ہرمز عالمی توانائی اور تجارت کا اہم راستہ ہے جس کی بندش سے عالمی منڈی متاثر ہوئی ہے۔ انہوں نے امید ظاہر کی کہ جلد مذاکرات کامیاب ہوں گے اور بحری راستہ دوبارہ کھل جائے گا۔
دفتر خارجہ نے بتایا کہ وزیراعظم شہباز شریف، نائب وزیراعظم اسحاق ڈار اور عسکری قیادت کی سطح پر مختلف ممالک سے رابطے جاری ہیں جن میں ایران، سعودی عرب، قطر اور ترکیہ شامل ہیں تاکہ خطے میں امن کو فروغ دیا جا سکے۔
بریفنگ میں بیرون ملک زیر حراست پاکستانیوں سے متعلق بھی آگاہ کیا گیا۔ صومالیہ میں اغوا شدہ جہاز کے عملے کی رہائی کے لیے کوششیں جاری ہیں جبکہ کمبوڈیا سے 80 سے زائد پاکستانیوں کی واپسی جلد متوقع ہے۔ یوگنڈا سے بھی متعدد شہری واپس آ رہے ہیں۔
دفتر خارجہ نے افغانستان کی جانب سے جنوبی وزیرستان میں سرحد پار گولہ باری کی مذمت کرتے ہوئے کہا کہ ایسے اقدامات خطے کے امن کے لیے خطرہ ہیں۔