پاکستان اور قطر نے دوطرفہ سکیورٹی تعاون کو مزید فروغ دینے اور باہمی رابطوں کو مضبوط بنانے پر اتفاق کیا ہے۔ یہ پیش رفت وزیر داخلہ محسن نقوی اور قطر کے وزیر داخلہ و داخلی سلامتی فورس (لخویہ) کے کمانڈر شیخ خلیفہ بن حمد کے درمیان دوحہ میں ملاقات کے دوران سامنے آئی۔
قطر کی وزارت داخلہ کے مطابق ملاقات میں دونوں ممالک کے درمیان سکیورٹی شعبے میں جاری تعاون کا جائزہ لیا گیا اور باہمی دلچسپی کے مختلف امور پر تبادلہ خیال کیا گیا۔ دونوں وزرا نے سکیورٹی تعاون کو مزید مؤثر بنانے کے لیے اقدامات پر بھی گفتگو کی۔
وزارت داخلہ قطر کے بیان کے مطابق شیخ خلیفہ بن حمد نے دوحہ میں پاکستانی وزیر داخلہ کا استقبال کیا، جہاں دونوں فریقین نے موجودہ سکیورٹی روابط، تعاون کے امکانات اور مشترکہ چیلنجز پر تبادلہ خیال کیا۔
یہ ملاقات ایسے وقت میں ہوئی ہے جب مشرق وسطیٰ میں امریکا اور ایران کے درمیان کشیدگی کے باعث علاقائی صورتحال حساس ہے۔ پاکستان اور قطر حالیہ دنوں میں کشیدگی کم کرنے، مذاکراتی عمل کو آگے بڑھانے اور خطے میں امن و استحکام کے لیے سفارتی کوششوں میں سرگرم کردار ادا کر رہے ہیں۔
ذرائع کے مطابق اسلام آباد اور دوحہ نے واشنگٹن اور تہران کے درمیان پیغامات کے تبادلے میں بھی کردار ادا کیا ہے تاکہ جاری تنازع کے خاتمے کے لیے سفارتی راستہ تلاش کیا جا سکے۔
اس سے قبل پاکستان اور قطر نے مشترکہ طور پر کشیدگی میں کمی کے لیے ایک تجویز پیش کی تھی، جس میں امریکا اور ایران پر زور دیا گیا تھا کہ وہ 9 جولائی سے پہلے والی پوزیشنز پر واپس جائیں تاکہ اعتماد سازی کے اقدامات کے ذریعے مذاکرات دوبارہ شروع کیے جا سکیں۔
پاکستانی اور قطری حکام کے مطابق دونوں ممالک علاقائی امن، سلامتی اور استحکام کے لیے قریبی مشاورت جاری رکھیں گے۔ سکیورٹی تعاون کے ساتھ ساتھ دونوں ممالک سفارتی رابطوں اور مشترکہ کوششوں کے ذریعے خطے میں کشیدگی کم کرنے کے لیے کردار ادا کرنے کے خواہاں ہیں۔