گوادر: وزیراعلیٰ بلوچستان میر سرفراز بگٹی ایک روزہ دورے پر گوادر پہنچے جہاں انہوں نے نیشنل یوتھ سمٹ کی اختتامی تقریب میں شرکت کی۔
سرکاری تفصیلات کے مطابق صوبائی وزراء بھی اس دورے میں وزیراعلیٰ کے ہمراہ تھے اور گوادر پہنچنے پر ان کا پرتپاک استقبال کیا گیا۔
وزیراعلیٰ اختتامی سیشن سے خطاب کریں گے جس کی براہ راست نشریات پاکستان ٹیلی ویژن پر دکھائی جائیں گی۔
دوسری جانب ۱۹ویں نیشنل ورکشاپ بلوچستان سے خطاب کرتے ہوئے وزیراعلیٰ نے کہا کہ حکومت صوبے میں گڈ گورننس، شفافیت اور عوامی خدمات کی بہتری کے لیے سنجیدہ اور عملی اقدامات کر رہی ہے۔
انہوں نے کہا کہ ریاستی رٹ کا قیام، آئین کی بالادستی اور عوامی حقوق کا تحفظ حکومت کی اولین ترجیحات میں شامل ہے۔
وزیراعلیٰ کے مطابق تعلیمی شعبے میں اصلاحات کے تحت ہزاروں بند اسکول دوبارہ فعال کیے گئے ہیں جبکہ اساتذہ کی بھرتیاں میرٹ پر کی جا رہی ہیں۔
انہوں نے کہا کہ سوشل میڈیا پر پھیلنے والی غلط معلومات کا مقابلہ کرنا ضروری ہے اور نوجوانوں کو مستند ذرائع سے رہنمائی حاصل کرنی چاہیے۔
میر سرفراز بگٹی نے کہا کہ پرامن احتجاج آئینی حق ہے لیکن اسے دوسروں کے حقوق متاثر کرنے کے لیے استعمال نہیں کیا جا سکتا، جبکہ حکومت قانون کے مطابق ریاست مخالف عناصر کے خلاف کارروائی جاری رکھے گی۔
انہوں نے بلوچستان میں امن، ترقی اور نوجوانوں کو بااختیار بنانے کے عزم کا اعادہ کیا۔