وفاقی وزیر جام کمال خان نے بلوچستان میں متوازن ترقی کیلئے ترقیاتی فنڈز کی منصفانہ اور مساوی تقسیم پر زور دیتے ہوئے کہا ہے کہ منصوبہ بندی سیاسی ترجیحات کے بجائے عوامی ضروریات کی بنیاد پر ہونی چاہیے۔
وفاقی وزیر نے کہا کہ بلوچستان میں ترقیاتی منصوبوں کی تقسیم آبادی، معاشی کردار، پسماندگی کی سطح اور حقیقی ضروریات کو مدنظر رکھتے ہوئے کی جانی چاہیے تاکہ صوبے کے تمام اضلاع کو ترقی کے یکساں مواقع فراہم کیے جا سکیں۔
انہوں نے کہا کہ بعض منتخب اضلاع کیلئے اربوں روپے مالیت کے ترقیاتی منصوبے مختص کیے گئے جبکہ متعدد دیگر اضلاع کو پبلک سیکٹر ڈویلپمنٹ پروگرام میں نظر انداز کیا گیا۔
جام کمال خان کے مطابق بعض علاقوں میں منتخب عوامی نمائندوں کی جانب سے تجویز کردہ منصوبوں کو بھی شامل نہیں کیا گیا، جس سے ترقیاتی عمل میں عدم توازن پیدا ہو سکتا ہے۔
انہوں نے کہا کہ بلوچستان میں پائیدار ترقی کیلئے شفاف اور مؤثر منصوبہ بندی ناگزیر ہے تاکہ ہر ضلع کو معاشی اور سماجی ترقی کے یکساں مواقع حاصل ہوں۔
وفاقی وزیر نے خبردار کیا کہ وسائل کی غیر مساوی تقسیم صوبے میں پہلے سے موجود حساس صورتحال کو مزید پیچیدہ بنا سکتی ہے، اس لیے ترقیاتی عمل میں تمام علاقوں کو مناسب نمائندگی دینا ضروری ہے۔
انہوں نے کہا کہ وزیراعلیٰ بلوچستان پورے صوبے اور اتحادی حکومت کے نمائندے ہیں، اس لیے ان کی ذمہ داری ہے کہ تمام علاقوں کے ساتھ متوازن اور غیر جانبدارانہ رویہ اختیار کرتے ہوئے ترقیاتی فیصلے کریں۔