کوئٹہ: بلوچستان حکومت نے صوبے کی تاریخ میں پہلی مرتبہ “پیپلز ایئر ایمبولینس” سروس شروع کرنے کا اعلان کیا ہے، جس کا مقصد دور دراز اور پسماندہ علاقوں کے مریضوں کو ہنگامی طبی سہولتیں فوری فراہم کرنا ہے۔
حکام کے مطابق یہ سروس سنگین زخمیوں، ٹریفک حادثات اور انتہائی تشویشناک طبی حالت کے مریضوں کو فوری طور پر کوئٹہ اور دیگر بڑے شہروں کے اسپتالوں تک منتقل کرنے کے لیے استعمال کی جائے گی، جہاں طویل فاصلے اور خراب سڑکیں علاج میں تاخیر کا سبب بنتی ہیں۔
وزیراعلیٰ بلوچستان میر سرفراز بگٹی نے کہا کہ ایئر ایمبولینس مکمل طور پر تیار ہے اور جلد عوام کیلئے باقاعدہ شروع کر دی جائے گی۔ انہوں نے کہا کہ اس منصوبے کا مقصد دور افتادہ علاقوں کے لوگوں کو بروقت طبی امداد فراہم کر کے قیمتی جانیں بچانا ہے۔
انہوں نے کہا کہ ماضی میں دشوار گزار علاقوں کے مکین بروقت علاج سے محروم رہتے تھے، تاہم یہ سروس اس خلا کو پُر کرنے میں مدد دے گی۔
ایئر ایمبولینس میں جدید طبی آلات، لائف سپورٹ سسٹم اور ہنگامی طبی سہولیات نصب کی گئی ہیں جبکہ دورانِ سفر مریضوں کو فوری طبی امداد فراہم کرنے کیلئے ماہر ڈاکٹرز اور تربیت یافتہ میڈیکل ٹیکنیشنز بھی موجود ہوں گے۔
حکام کا کہنا ہے کہ اس منصوبے سے بلوچستان میں ایمرجنسی رسپانس نظام مزید مؤثر ہوگا اور دور دراز علاقوں کے مریضوں کو بروقت علاج تک رسائی حاصل ہو سکے گی۔
وزیراعلیٰ سرفراز بگٹی نے اس منصوبے کو صرف ٹرانسپورٹ نہیں بلکہ ایک انسانی فلاحی اقدام قرار دیتے ہوئے کہا کہ پاکستان پیپلز پارٹی کے چیئرمین بلاول بھٹو زرداری جلد اس سروس کا افتتاح کریں گے۔