پاکستان اور International Monetary Fund کے درمیان اسٹاف لیول معاہدہ طے پا گیا ہے جس کے تحت ملک کو تقریباً 1.2 ارب ڈالر کی دو قسطوں کی منظوری دی جائے گی، جبکہ یہ معاہدہ ایگزیکٹو بورڈ کی حتمی منظوری سے مشروط ہوگا۔
معاہدے کے مطابق 1 ارب ڈالر ایکسٹینڈڈ فنڈ فیسلٹی (EFF) اور 210 ملین ڈالر ریزیلینس اینڈ سسٹین ایبیلٹی فیسلٹی (RSF) کے تحت جاری کیے جائیں گے، جس کے بعد مجموعی ادائیگیاں تقریباً 4.5 ارب ڈالر تک پہنچ جائیں گی۔
آئی ایم ایف مشن چیف ایوا پیٹرووا نے خبردار کیا ہے کہ مشرق وسطیٰ کی جنگ پاکستان کی معیشت پر اثر انداز ہو سکتی ہے، جس سے مہنگائی، توانائی کی قیمتوں اور بیرونی کھاتوں پر دباؤ بڑھنے کا خدشہ ہے۔
فنڈ نے پاکستان پر زور دیا ہے کہ سخت مالی نظم و ضبط برقرار رکھا جائے، ٹیکس نیٹ کو وسیع کیا جائے، اخراجات پر کنٹرول مضبوط کیا جائے اور توانائی شعبے میں اصلاحات جاری رکھی جائیں، جبکہ اسٹیٹ بینک کو مہنگائی 7.5 فیصد ہدف کے اندر رکھنے کی ہدایت دی گئی ہے۔
دوسری جانب حکومت نے سماجی تحفظ کے پروگرامز اور مالی اصلاحات جاری رکھنے کے عزم کا اظہار کیا ہے، تاکہ کم آمدنی والے طبقات کو مہنگائی کے اثرات سے محفوظ رکھا جا سکے اور معاشی استحکام برقرار رہے۔