مشرق وسطیٰ میں جنگی صورتحال مزید شدت اختیار کر گئی ہے جہاں ایران نے پیر کے روز اسرائیل پر میزائلوں کی متعدد لہریں فائر کیں جبکہ اسرائیلی فضائیہ نے تہران میں اہداف کو نشانہ بنانے کا دعویٰ کیا ہے۔ ایرانی حکام نے سخت ردعمل دیتے ہوئے کہا ہے کہ وہ جارحیت کا “سخت بدلہ” لیں گے۔
اسرائیلی فوج کے مطابق یمن کی جانب سے داغے گئے دو ڈرونز کو فضا میں ہی تباہ کر دیا گیا، جبکہ حوثی گروپ نے بھی اسرائیل پر حملوں کی ذمہ داری قبول کرنے کے اشارے دیے ہیں۔ اسرائیلی حکام کا کہنا ہے کہ یمن سے داغے گئے میزائل حالیہ کشیدگی کے بعد پہلی بڑی کارروائی ہے۔
اسرائیلی فوج نے دعویٰ کیا ہے کہ اس کے جنگی طیاروں نے تہران میں فوجی تنصیبات کو نشانہ بنایا ہے جبکہ لبنان کے دارالحکومت بیروت میں بھی حزب اللہ سے منسلک انفراسٹرکچر پر حملے کیے گئے ہیں۔
دوسری جانب امریکی صدر نے کہا ہے کہ ایران کے ساتھ براہ راست اور بالواسطہ مذاکرات جاری ہیں، تاہم خطے میں امریکی فوجی موجودگی میں اضافہ بھی کیا جا رہا ہے۔ صورتحال کے پیش نظر عالمی منڈی میں تیل کی قیمتوں میں بھی اضافہ دیکھا گیا ہے۔
خطے میں بڑھتی ہوئی کشیدگی نے عالمی طاقتوں کو تشویش میں مبتلا کر دیا ہے جبکہ ایران اور اسرائیل کے درمیان براہ راست تصادم کے خدشات مزید بڑھ گئے ہیں۔