وزیراعلیٰ بلوچستان میر سرفراز بگٹی نے کہا ہے کہ صوبائی حکومت نوجوانوں کو عالمی معیار کی تعلیم کی فراہمی اور تعلیمی اداروں کی مضبوطی کے لیے ہر ممکن اقدامات کر رہی ہے۔ انہوں نے اس عزم کا اظہار گرلز کیڈٹ کالج کوئٹہ کے دورے کے دوران کیا، جہاں ان کے ہمراہ کور کمانڈر بلوچستان لیفٹیننٹ جنرل راحت نسیم احمد خان بھی موجود تھے۔
دورے کے دوران وزیراعلیٰ نے کالج کے تدریسی شعبوں، تربیتی مراکز اور تعلیمی سہولیات کا جائزہ لیا اور ادارے میں تعلیم و تربیت کے اعلیٰ معیار اور نظم و ضبط کو سراہا۔ انہوں نے طالبات سے خطاب کرتے ہوئے گرلز کیڈٹ کالج کو پاکستان کے ممتاز تعلیمی اداروں میں شمار کیا اور انہیں اپنی عملی زندگی میں قومی یکجہتی، امن، حب الوطنی اور خدمتِ خلق کو شعار بنانے کی تلقین کی۔
میر سرفراز بگٹی نے کہا کہ بلوچستان حکومت باصلاحیت طلبہ و طالبات کو دنیا کی معروف جامعات، جن میں ہارورڈ اور آکسفورڈ بھی شامل ہیں، میں اعلیٰ تعلیم کے مواقع فراہم کرنے کے لیے عملی اقدامات کر رہی ہے تاکہ عالمی معیار کی افرادی قوت تیار کی جا سکے۔ انہوں نے نوجوانوں پر زور دیا کہ وہ جھوٹی خبروں، گمراہ کن پروپیگنڈے اور انتہاپسندانہ نظریات سے خود کو محفوظ رکھیں اور اپنی تمام تر توجہ تعلیم اور کردار سازی پر مرکوز رکھیں۔
وزیراعلیٰ نے اس موقع پر گرلز کیڈٹ کالج کوئٹہ کے لیے ایک کروڑ 20 لاکھ روپے کی خصوصی گرانٹ کا اعلان کرتے ہوئے کہا کہ صوبائی حکومت اس ادارے کی سرپرستی اور ترقی کے لیے اپنا بھرپور تعاون جاری رکھے گی تاکہ اسے عالمی معیار کا تعلیمی مرکز بنایا جا سکے۔
دورے کے اختتام پر وزیراعلیٰ اور کور کمانڈر بلوچستان نے کالج کیمپس میں یادگاری پودا بھی لگایا اور ادارے کی مزید ترقی و کامیابی کے لیے نیک تمناؤں کا اظہار کیا۔
