بلوچستان میں تاجروں اور ٹرانسپورٹرز نے صوبائی حکومت کے ساتھ کامیاب مذاکرات کے بعد اپنی ہڑتال ختم کرنے کا اعلان کر دیا ہے، جس کے بعد صوبے بھر میں تجارتی اور ٹرانسپورٹ سرگرمیوں کی بحالی متوقع ہے۔
تفصیلات کے مطابق یہ پیش رفت صوبائی وزیر داخلہ میر ضیاء اللہ لانگو، ایڈیشنل چیف سیکرٹری داخلہ حمزہ شفقات، ڈپٹی کمشنر کوئٹہ اور تاجر برادری کے نمائندوں کے درمیان ہونے والے مذاکرات کے دوران سامنے آئی۔ مذاکرات کے بعد حکومت کی جانب سے مسائل کے حل کی یقین دہانی پر ہڑتال ختم کرنے پر اتفاق کیا گیا۔
حکومتی ترجمان بابر یوسفزئی نے کہا کہ صوبائی حکومت تاجروں اور ٹرانسپورٹرز کو درپیش مسائل کے حل کے لیے سنجیدہ اقدامات کر رہی ہے اور کاروباری سرگرمیوں کو سہولت فراہم کرنا اولین ترجیح ہے۔
انہوں نے کہا کہ کچھ عناصر بلوچستان میں معاشی سرگرمیوں کو متاثر کرنے کی کوشش کر رہے ہیں، تاہم حکومت امن و امان اور اقتصادی استحکام کے لیے تمام ضروری اقدامات کر رہی ہے۔ حکام کے مطابق ہڑتال کے خاتمے سے صوبے میں معمولات زندگی اور کاروباری سرگرمیاں بحال ہو جائیں گی۔