پاکستان اور ہانگ کانگ کا تجارت و اقتصادی تعاون مزید بڑھانے پر اتفاق، کیتھے پیسفک کی پروازیں بحال کرنے پر بھی غور

پاکستان اور ہانگ کانگ نے تجارت اور اقتصادی تعاون کو مزید وسعت دینے پر اتفاق کیا ہے، جبکہ وفاقی وزیر تجارت جام کمال خان نے خدمات، ہوابازی، مالیات اور کاروباری روابط میں تعاون بڑھانے پر زور دیا۔ وفاقی وزیر نے 11 ستمبر کو ہانگ کانگ کے چیف ایگزیکٹو جان لی کا چیو سے ملاقات کے دوران پاکستان کے لیے کیتھے پیسفک کی پروازیں دوبارہ شروع کرنے کی تجویز بھی پیش کی۔ ان کا کہنا تھا کہ بہتر فضائی رابطہ کاروباری سرگرمیوں، سیاحت اور تجارتی تبادلوں کو فروغ دے سکتا ہے۔ جام کمال خان نے ہانگ کانگ میں مقیم پاکستانی برادری کی جانب سے ملکی معیشت کے لیے ترسیلات زر اور عوامی روابط میں کردار کو بھی اجاگر کیا۔ انہوں نے چین کے ساتھ پاکستان کے دیرینہ تعلقات اور ہانگ کانگ کے ساتھ تجارتی و اقتصادی شراکت داری کو مزید مضبوط بنانے کے عزم کا اظہار کیا۔ ہانگ کانگ کے چیف ایگزیکٹو نے علاقائی امن اور استحکام کے لیے پاکستان کے کردار کو سراہا اور عالمی اقتصادی ترقی کے لیے کشیدگی میں کمی کی اہمیت پر زور دیا۔ دونوں جانب نے باہمی اقتصادی مفادات کے مزید شعبوں میں تعاون تلاش کرنے پر اتفاق کیا۔ وفاقی وزیر نے جان لی کو پاکستان کے دورے کی دعوت بھی دی۔ الگ ملاقات میں ہانگ کانگ کے سیکریٹری تجارت و اقتصادی ترقی کے ساتھ کاروباری وفود کے تبادلے، فضائی رابطوں، مالیات، خدمات اور تجارت میں مزید تعاون پر بھی گفتگو ہوئی