گوادر: چین پاکستان اقتصادی راہداری (سی پیک) پر کام کرنے والے ورکرز کی محنت اور تجربات پر مبنی ڈاکیومنٹری سیریز “فرم شیان ٹو گوادر پورٹ” کے دوسرے سیزن “گریٹ اینڈیورز آف ورکرز” کی اختتامی تقریب گوادر پورٹ پر منعقد ہوئی۔
یہ پروڈکشن Shaanxi Zhongshan Culture Media Co., Ltd. اور Pakistan Television Corporation کے اشتراک سے تیار کی گئی ہے، جس میں سی پیک منصوبوں کے فرنٹ لائن ورکرز کی کہانیاں اور تجربات کو دستاویزی شکل دی گئی ہے۔
تقریب میں پاکستان اور چین سے تقریباً 300 مہمانوں نے شرکت کی۔ ڈاکیومنٹری کے ڈائریکٹر بائی ژیجون کے مطابق اس منصوبے کا مقصد چین پاکستان تعاون کے پیچھے موجود محنت، عزم اور انسانی کہانیوں کو اجاگر کرنا ہے۔
رپورٹ کے مطابق گزشتہ ایک سال کے دوران فلم بندی چین کے مختلف شہروں شیان، بیجنگ، شنگھائی، تیانجن، گوانگژو اور زیامن سمیت پاکستان کے مختلف علاقوں میں کی گئی، جس کے دوران ٹیم نے تقریباً 30 ہزار کلومیٹر کا سفر کیا۔
ڈائریکٹر نے کہا کہ چین پاکستان دوستی کی اصل طاقت سرحدوں سے ماورا باہمی اعتماد اور تعاون میں ہے۔ ڈاکیومنٹری کو رواں سال دونوں ممالک میں ریلیز کیے جانے کی توقع ہے، جو سفارتی تعلقات کی 75ویں سالگرہ کے موقع پر پیش کی جائے گی۔