واشنگٹن، امریکہ کے صدر ڈونلڈ ٹرمپ نے کہا ہے کہ امریکہ اور ایران کے درمیان ایک اور دور کے مذاکرات آئندہ 36 سے 72 گھنٹوں کے اندر ہو سکتے ہیں، جو ممکنہ طور پر اسلام آباد میں منعقد کیے جائیں گے۔
رپورٹس کے مطابق یہ امکان اس وقت سامنے آیا ہے جب پاکستان کی ثالثی سے جاری پہلے مرحلے کے مذاکرات کے بعد فریقین کے درمیان دوبارہ رابطوں میں تیزی دیکھی جا رہی ہے۔
ٹرمپ نے یہ بیان ایک غیر ملکی اخبار کو ٹیکسٹ پیغام کے ذریعے دیا، جس میں انہوں نے کہا کہ آئندہ ملاقات جلد ہونے کا امکان ہے، تاہم اس حوالے سے حتمی تصدیق ابھی نہیں ہوئی۔
یہ پیش رفت ایسے وقت میں سامنے آئی ہے جب امریکی صدر نے ایک روز قبل ایران کے ساتھ جاری دو ہفتوں کی جنگ بندی میں توسیع کا اعلان کیا تھا، جس کے بعد خطے میں سفارتی سرگرمیوں میں اضافہ ہوا ہے۔