پاکستان میں سابق قومی سلامتی مشیر جنرل (ر) ناصر خان جنجوعہ نے کہا ہے کہ گوادر مستقبل میں عالمی تجارت کا اہم گیٹ وے بننے کی مکمل صلاحیت رکھتا ہے اور پاکستان کی جغرافیائی حیثیت اسے ایک قدرتی تجارتی پل بناتی ہے۔
تفصیلات کے مطابق لاہور چیمبر آف کامرس اینڈ انڈسٹری میں تقریب سے خطاب کرتے ہوئے انہوں نے کہا کہ پاکستان کو ابھی تک اپنی اسٹریٹجک جغرافیائی اہمیت کا مکمل ادراک نہیں ہوا، حالانکہ یہ خطہ مشرق وسطیٰ، وسطی ایشیا، چین اور یورپ کو جوڑتا ہے۔
انہوں نے کہا کہ گوادر بندرگاہ پاکستان اور خطے کی معیشت میں بنیادی تبدیلی لا سکتی ہے، جبکہ آبنائے ہرمز سے گزرنے والی عالمی تیل کی بڑی مقدار پاکستان کی اسٹریٹجک اہمیت کو مزید بڑھاتی ہے۔
جنجوعہ نے کہا کہ مستقبل میں تجارتی اور توانائی کے نئے راستے پاکستان سے گزریں گے، جس سے ملک کی عالمی حیثیت مزید مضبوط ہوگی۔
اس موقع پر لاہور چیمبر اور گوادر جمخانہ کے درمیان مفاہمتی یادداشت پر دستخط بھی کیے گئے، جبکہ شرکاء نے گوادر میں سرمایہ کاری اور ترقی کے مواقع کو پاکستان کی معیشت کے لیے اہم قرار دیا۔