اسلام آباد، پاکستان میں منصوبہ بندی کے وزیر احسن اقبال نے کہا ہے کہ ترقیاتی اخراجات میں کمی اور مشرق وسطیٰ میں جاری کشیدگی کے باعث ملکی اقتصادی ترقی کی رفتار سست پڑ سکتی ہے۔
تفصیلات کے مطابق حکومت نے پبلک سیکٹر ڈویلپمنٹ پروگرام میں تقریباً 173 ارب روپے کی کٹوتی کی ہے، جس کے بعد ترقیاتی بجٹ 1.01 کھرب روپے سے کم ہو کر 837 ارب روپے رہ گیا ہے۔
وزیر منصوبہ بندی نے کہا کہ عالمی سطح پر تیل کی بڑھتی ہوئی قیمتیں، سپلائی چین میں رکاوٹیں اور مہنگائی پاکستان کی معیشت پر دباؤ ڈال رہی ہیں، جس سے 4.2 فیصد ترقی کا ہدف متاثر ہو سکتا ہے۔
ان کے مطابق بین الاقوامی مالیاتی ادارے پہلے ہی پاکستان کی شرح نمو 3.2 سے 3.5 فیصد کے درمیان رہنے کی پیش گوئی کر رہے ہیں، جو حکومتی ہدف سے کم ہے۔
احسن اقبال نے مزید کہا کہ مشرق وسطیٰ کے حالات کا اثر آئندہ مالی سال میں زیادہ واضح ہوگا اور عالمی معیشت کے لیے بھی چیلنجز بڑھ سکتے ہیں۔