بلوچستان کے صنعتی شہر حب میں 4.5 ارب ڈالر مالیت کی ڈیپ کنورژن ریفائنری کے قیام کا منصوبہ پیش کیا گیا ہے جسے پاکستان کے توانائی شعبے میں ایک بڑی پیش رفت قرار دیا جا رہا ہے۔ منصوبہ SPEC ریفائنری پرائیویٹ لمیٹڈ کی جانب سے پیش کیا گیا ہے اور اس کے تحت جدید ٹیکنالوجی کے ذریعے مختلف اقسام کے خام تیل کو پراسیس کیا جائے گا۔
تفصیلات کے مطابق یہ پاکستان کی پہلی گرین فیلڈ ڈیپ کنورژن ریفائنری ہوگی جس کا مقصد ملک میں پیٹرولیم مصنوعات کی درآمدات پر انحصار کم کرنا اور اعلیٰ معیار کی مصنوعات کی مقامی پیداوار بڑھانا ہے۔ منصوبے کے دوران اور بعد از آپریشن تقریباً 2 ہزار براہ راست اور بالواسطہ روزگار کے مواقع پیدا ہونے کا امکان ہے۔
وفاقی وزیر برائے تجارت جام کمال خان نے منصوبے کو ملک کی صنعتی ترقی اور توانائی تحفظ کے لیے اہم قرار دیتے ہوئے کہا کہ اس سے نہ صرف مقامی صنعت مضبوط ہوگی بلکہ غیر ملکی سرمایہ کاری کے مواقع بھی بڑھیں گے۔
منصوبہ حکومت کی گرین فیلڈ ریفائنری پالیسی کے تحت ترقی پا رہا ہے تاہم حکام کے مطابق اس کی تکمیل اور رفتار کا انحصار ریگولیٹری منظوریوں اور مالیاتی عملدرآمد پر ہوگا۔ اس ریفائنری کے ذریعے پاکستان میں پیٹرولیم اور پیٹروکیمیکل سیکٹر میں بڑی تبدیلی متوقع ہے۔