کوئٹہ، 14 اپریل (ویب ڈیسک): وزیراعلیٰ بلوچستان میر سرفراز بگٹی نے افسران کے لیے ڈیجیٹل مانیٹرنگ اور لائیو لوکیشن حاضری سسٹم کی منظوری دے دی ہے۔
تفصیلات کے مطابق وزیراعلیٰ نے ترقیاتی منصوبوں کی بروقت تکمیل کو یقینی بنانے کی ہدایت جاری کرتے ہوئے غیرحاضری اور غفلت برتنے والے افسران کے خلاف سخت کارروائی کا حکم دیا۔
انہوں نے کہا کہ عوامی منصوبوں میں تاخیر کسی صورت برداشت نہیں کی جائے گی اور کارکردگی بہتر بنانے کے لیے جدید ٹیکنالوجی کا استعمال ناگزیر ہے۔
حکام کے مطابق نیا سسٹم سرکاری افسران کی فیلڈ موجودگی، منصوبوں کی پیش رفت اور کارکردگی کی مؤثر نگرانی میں مدد دے گا۔