اسلام آباد (GWADAR SPEAKS – ویب ڈیسک): وزیرِ اعظم شہباز شریف نے ہر شہری کو اپنا گھر فراہم کرنے کے عزم کا اعادہ کرتے ہوئے کہا ہے کہ آسان شرائط پر ہاؤسنگ قرضوں کی فراہمی حکومت کی اولین ترجیح ہے۔
ہاؤسنگ شعبے میں سرمایہ کاری پر زور
وزیراعظم کی زیر صدارت رہائشی شعبے میں سرمایہ کاری، کم لاگت گھروں کی فراہمی اور روزگار کے مواقع بڑھانے سے متعلق اہم اجلاس منعقد ہوا۔ اجلاس سے خطاب کرتے ہوئے انہوں نے کہا کہ پاکستان میں ہاؤسنگ سیکٹر میں سرمایہ کاری کے وسیع مواقع موجود ہیں، جن سے بھرپور فائدہ اٹھانے کے لیے تمام رکاوٹیں دور کی جائیں گی۔
بیرونی سرمایہ کاری کے لیے اقدامات
وزیراعظم نے متعلقہ حکام کو ہدایت کی کہ بیرونی سرمایہ کاروں اور اوورسیز پاکستانیوں کی سرمایہ کاری کے تحفظ کو یقینی بنایا جائے۔ ان کا کہنا تھا کہ تعمیرات کے شعبے میں سرمایہ کاری کے فروغ سے نہ صرف معیشت مستحکم ہوگی بلکہ لاکھوں افراد کے لیے روزگار کے نئے مواقع بھی پیدا ہوں گے۔
جامع حکمت عملی تیار کرنے کی ہدایت
اجلاس میں حکام کو ہدایت دی گئی کہ ہاؤسنگ اور تعمیراتی شعبے میں سرمایہ کاری بڑھانے کے لیے قابلِ عمل حکمت عملی تیار کی جائے، جس میں پبلک اور پرائیویٹ سیکٹر کے ساتھ ساتھ صوبائی حکومتوں، آزاد کشمیر اور گلگت بلتستان کو بھی شامل کیا جائے۔
ترقی اور روزگار کے امکانات
بریفنگ میں بتایا گیا کہ اوورسیز پاکستانیوں اور غیر ملکی سرمایہ کاروں کے لیے خصوصی سہولیات فراہم کی جا رہی ہیں، جس سے رہائشی منصوبوں میں اضافہ، معاشی سرگرمیوں میں تیزی اور روزگار کے مواقع پیدا ہونے کی توقع ہے۔