بلوچستان میں ٹرین سروس معطل، ریلوے نظام مکمل طور پر بند

کوئٹہ، بلوچستان میں ریلوے حکام نے ہنگامی مرمت اور ٹریک کی بحالی کے پیش نظر 27 مارچ کو صوبے بھر میں تمام ٹرین سروسز معطل کرنے کا اعلان کیا ہے۔ حکام کے مطابق یہ فیصلہ کسی ممکنہ حادثے سے بچاؤ اور مسافروں کی حفاظت کو یقینی بنانے کیلئے احتیاطی اقدام کے طور پر کیا گیا ہے۔

اعلامیے کے مطابق پشاور سے آنے والی جعفر ایکسپریس کو جیکب آباد سے واپس بھیج دیا جائے گا جبکہ کوئٹہ سے پشاور جانے والی ٹرین بھی منسوخ کردی گئی ہے، جس سے ہزاروں مسافروں کو شدید مشکلات کا سامنا ہے۔ اس کے علاوہ بولان میل اور چمن پسنجر پہلے ہی معطل ہیں، جس کے باعث آج بلوچستان کی ریلوے لائنوں پر مکمل خاموشی رہے گی۔

ریلوے حکام نے واضح کیا ہے کہ یہ معطلی صرف ایک روز کیلئے ہے اور مرمتی کام مکمل ہوتے ہی ٹرین سروس بحال کردی جائے گی۔ متاثرہ مسافروں کیلئے مکمل ریفنڈ کا اعلان بھی کیا گیا ہے تاکہ انہیں مالی نقصان نہ ہو۔

یہ صورتحال خاص طور پر دور دراز علاقوں کے رہائشیوں کیلئے تشویشناک ہے جہاں ٹرین سفر کا سب سے سستا اور محفوظ ذریعہ سمجھی جاتی ہے۔ حکام نے مسافروں کو ہدایت کی ہے کہ سفر سے قبل ریلوے اسٹیشنز یا متعلقہ دفاتر سے تازہ صورتحال معلوم کریں۔