اسلام آباد/ارومچی: پاکستان، افغانستان اور چین کے درمیان ہونے والے سہ فریقی مذاکرات بغیر کسی پیش رفت کے ختم ہو گئے، جس سے اسلام آباد اور کابل کے درمیان کشیدگی مزید نمایاں ہو گئی۔
ذرائع کے مطابق ارومچی میں ہونے والے اس اہم اجلاس میں دونوں ممالک کے درمیان جاری سیکیورٹی مسائل اور اختلافات پر بات چیت کی گئی، تاہم کوئی ٹھوس نتیجہ سامنے نہ آ سکا، البتہ رابطوں کی بحالی کو ایک محدود پیش رفت قرار دیا جا رہا ہے۔
پاکستان نے ایک بار پھر افغانستان میں تحریک طالبان پاکستان کے محفوظ ٹھکانوں پر تشویش کا اظہار کیا، جبکہ افغان حکام نے ان سرگرمیوں کی براہ راست ذمہ داری قبول کرنے سے گریز کیا۔
چین نے مذاکرات میں فعال کردار ادا کرتے ہوئے دونوں ممالک پر زور دیا کہ وہ کشیدگی کم کرنے کیلئے تجارتی روابط بحال کریں اور اقتصادی تعاون کو فروغ دیں۔
ذرائع کے مطابق افغان حکام نے بعض سیکیورٹی خدشات پر قابل تصدیق اقدامات پر غور کی آمادگی ظاہر کی، تاہم اس حوالے سے کوئی حتمی یقین دہانی نہیں کرائی گئی۔
یہ مذاکرات اس بات کی عکاسی کرتے ہیں کہ دونوں ممالک کے درمیان اختلافات اب بھی گہرے ہیں، جس کے باعث خطے میں پائیدار استحکام کیلئے کوششیں تاحال محدود نتائج دے رہی ہیں۔