کوئٹہ، 26 مارچ : صوبائی ڈیزاسٹر مینجمنٹ اتھارٹی (پی ڈی ایم اے) بلوچستان نے متوقع بارشوں اور ممکنہ ہنگامی صورتحال سے مؤثر نمٹنے کے لیے مون سون کنٹیجنسی پلان 2026 جاری کر دیا ہے۔
یہ جامع منصوبہ تیاری، بروقت ردعمل، بین الادارہ جاتی رابطہ کاری اور انسانی جان و مال کے تحفظ پر مرکوز ہے۔ اس میں اضلاع اور حساس علاقوں کا تفصیلی جائزہ شامل ہے جہاں اچانک سیلاب، ندی نالوں میں طغیانی، لینڈ سلائیڈنگ اور دیگر خطرات کا خدشہ ہے۔
ماضی کے تجربات، بارشوں کے رجحانات اور موسمیاتی تبدیلی کے خطرات کو مدنظر رکھتے ہوئے منصوبے میں انسانی جانوں، انفراسٹرکچر، زراعت، مواصلاتی نظام اور بنیادی خدمات کے تحفظ کے لیے حکمت عملی وضع کی گئی ہے۔
حکومتی محکموں، ضلعی انتظامیہ اور امدادی اداروں کو واضح ذمہ داریاں تفویض کر دی گئی ہیں۔
پیشگی اقدامات کے تحت بھاری مشینری، ریسکیو آلات، طبی سامان، ادویات، ایمبولینسز، صاف پانی اور نکاسی آب کی سہولیات کو پہلے سے تیار رکھنے کی ہدایات دی گئی ہیں تاکہ فوری ردعمل ممکن بنایا جا سکے۔
متاثرہ علاقوں میں محفوظ مقامات اور عارضی پناہ گاہیں قائم کی گئی ہیں جہاں بے گھر افراد کے لیے خوراک، طبی سہولیات، صاف پانی اور دیگر ضروری اشیاء کی فراہمی یقینی بنائی جائے گی۔ ضلعی سطح پر ریلیف سرگرمیوں کی نگرانی اور فوری فیصلوں کے لیے مؤثر نظام بھی قائم کیا گیا ہے۔
پی ڈی ایم اے نے صوبائی، ڈویژنل اور ضلعی سطح پر فوکل پرسنز مقرر کیے ہیں تاکہ رابطہ کاری اور معلومات کے تبادلے کو بہتر بنایا جا سکے۔ این جی اوز، رضاکار تنظیموں، اقوام متحدہ کے شراکتی اداروں اور دیگر امدادی تنظیموں کے ساتھ تعاون کو بھی منصوبے کا حصہ بنایا گیا ہے تاکہ مربوط ردعمل یقینی ہو سکے۔
حکام نے تمام محکموں اور ریسکیو سروسز کو مون سون کے دوران ہائی الرٹ رہنے کی ہدایت کی ہے، جبکہ عوام کو احتیاط برتنے، ندی نالوں اور سیلابی علاقوں کے قریب غیر ضروری نقل و حرکت سے گریز کرنے، سرکاری موسمی ہدایات پر عمل کرنے اور کسی بھی ہنگامی صورتحال میں فوری طور پر متعلقہ اداروں سے رابطہ کرنے کا مشورہ دیا گیا ہے۔