وزیراعلیٰ بلوچستان میر سرفراز بگٹی نے اعلیٰ تعلیم کے فروغ، جامعات کی استعداد کار بڑھانے اور طلبہ کو جدید دور کے تقاضوں سے ہم آہنگ سہولیات فراہم کرنے کے عزم کا اعادہ کرتے ہوئے کہا ہے کہ نوجوانوں کو جدید علوم اور ٹیکنالوجی سے آراستہ کرنا حکومت کی اولین ترجیح ہے۔ یونیورسٹی آف مکران پنجگور کے شعبہ کمپیوٹر سائنسز کو درپیش مسائل اور تدریسی معیار بہتر بنانے سے متعلق اعلیٰ سطحی اجلاس کی صدارت کرتے ہوئے وزیراعلیٰ نے فوری اقدامات کی منظوری دی۔ اجلاس میں فیصلہ کیا گیا کہ شعبے میں فوری طور پر ایک پی ایچ ڈی چیئرمین اور دو لیکچررز تعینات کیے جائیں گے جبکہ مستقل تدریسی عملے کی بھرتی بھی عمل میں لائی جائے گی تاکہ طلبہ کو معیاری تعلیم میسر آسکے۔ وزیراعلیٰ نے ہدایت کی کہ انفارمیشن ٹیکنالوجی اور کمپیوٹر سائنسز جیسے اہم شعبوں میں تعلیمی معیار بلند کرنے کے لیے تمام ضروری اقدامات فوری مکمل کیے جائیں۔ انہوں نے واضح کیا کہ تعلیمی اداروں کو درپیش مسائل کے حل اور اعلیٰ تعلیم کے شعبے میں پائیدار اصلاحات کے لیے حکومت عملی اقدامات کر رہی ہے اور اس ضمن میں کسی قسم کی غفلت یا تاخیر برداشت نہیں کی جائے گی۔ وزیراعلیٰ کا کہنا تھا کہ جدید تعلیم یافتہ اور باصلاحیت نوجوان ہی بلوچستان کے روشن مستقبل کی ضمانت ہیں، اسی لیے صوبے بھر کی جامعات میں تعلیمی ماحول، تدریسی معیار اور جدید سہولیات کی فراہمی کو یقینی بنایا جا رہا ہے۔
