بلوچستان، پاکستان میں وزیراعلیٰ سرفراز بگٹی نے پاکستان نیول وار کالج کے 55ویں تربیتی کورس کے شرکاء سے ملاقات کی، جس میں علاقائی امن اور سکیورٹی امور پر تبادلہ خیال کیا گیا۔
وزیراعلیٰ نے خطے میں امن کے فروغ میں سول و عسکری قیادت کے کردار کو سراہتے ہوئے کہا کہ بلوچستان میں پائیدار امن کے لیے مشترکہ اقدامات ناگزیر ہیں۔ انہوں نے کہا کہ نوجوانوں کو قومی دھارے میں شامل کرنا وقت کی اہم ضرورت ہے اور صوبائی پالیسیوں کا مرکز نوجوان ہیں۔
سرفراز بگٹی نے کہا کہ بلوچستان میں دہشت گردی کے خلاف مؤثر اقدامات کیے جا رہے ہیں اور پولیس کی استعداد بڑھانے کے لیے 40 ارب روپے فراہم کیے جا رہے ہیں جبکہ محکمہ انسداد دہشت گردی کے لیے مزید 10 ارب روپے مختص کیے گئے ہیں۔
انہوں نے کہا کہ نوجوانوں کے مسائل سننے اور انہیں حل کرنے کے لیے اقدامات جاری ہیں، صوبے کی پہلی یوتھ پالیسی بھی متعارف کرائی جا چکی ہے۔ وزیراعلیٰ نے واضح کیا کہ ریاست کے خلاف ہتھیار اٹھانے والوں کے ساتھ کوئی رعایت نہیں ہوگی جبکہ امن و استحکام کے لیے میرٹ، مکالمہ اور مؤثر حکمت عملی جاری رکھی جائے گی۔