بینک آف خیبر اور خیبر پختونخوا کے محکمہ لائیو اسٹاک اینڈ ڈیری ڈویلپمنٹ نے بے روزگار ویٹرنری گریجویٹس کو بلاسود موٹرسائیکلیں فراہم کرنے کے منصوبے کے لیے مفاہمتی یادداشت پر دستخط کر دیے۔ معاہدے کے تحت سالانہ ترقیاتی پروگرام (ADP) کے منصوبے کا مقصد ڈاکٹر آف ویٹرنری میڈیسن (DVM) گریجویٹس اور ضرورت پڑنے پر ڈپلومہ ہولڈرز کو خصوصی موٹرسائیکلیں فراہم کرکے دیہی علاقوں میں جانوروں کی طبی خدمات تک رسائی بہتر بنانا ہے۔ محکمہ لائیو اسٹاک نے اس منصوبے کے لیے فنڈز مختص کیے ہیں، جبکہ بینک آف خیبر اسکیم پر عملدرآمد اور بلاسود قرضوں کی فراہمی کا ذمہ دار ہوگا۔ فراہم کی جانے والی موٹرسائیکلوں میں ادویات رکھنے کے لیے خصوصی اسٹوریج یونٹس بھی نصب ہوں گے، جس سے ویٹرنری ماہرین کو دور دراز علاقوں میں جانوروں کے علاج اور ضروری ادویات کی فراہمی میں سہولت ملے گی۔ یہ موٹرسائیکلیں خیبر پختونخوا کے مختلف اضلاع میں تقسیم کی جائیں گی تاکہ دیہی علاقوں میں ویٹرنری سروسز کا دائرہ وسیع کیا جاسکے۔ مفاہمتی یادداشت پر بینک آف خیبر کے گروپ ہیڈ ریٹیل بینکنگ گل بہار خان اور محکمہ لائیو اسٹاک کے ڈائریکٹر جنرل ڈاکٹر اسل خان نے دستخط کیے۔ تقریب میں صوبائی وزیر لائیو اسٹاک خورشید خٹک بھی موجود تھے۔ بینک حکام کے مطابق یہ اقدام صوبے کے عوام کی معاشی خودمختاری، روزگار کے مواقع اور جانوروں کی صحت سے متعلق خدمات کے فروغ میں معاون ثابت ہوگا۔
29°C
Sunny