گوادر میں عسکریت پسندوں کا مقابلہ کرتے ہوئے شہید ہونے والے بلوچستان پولیس کے کانسٹیبل محمد خُماری کو بہادری اور فرض شناسی کے اعتراف میں بعد از شہادت ستارہ شجاعت سے نواز دیا گیا ہے۔
بلوچستان پولیس کے مطابق صدر مملکت آصف علی زرداری نے یوم آزادی کے موقع پر قومی اعزاز دینے کی منظوری دی۔ ستارہ شجاعت ان قومی اعزازات میں شامل ہے جو غیر معمولی بہادری اور ملک کے لیے خدمات انجام دینے والے افراد کو دیے جاتے ہیں۔
پولیس کے مطابق محمد خُماری 11 مئی 2025 کو گوادر کے بلال مسجد کے علاقے میں عسکریت پسندوں کے ساتھ جھڑپ کے دوران شہید ہوئے۔ پولیس ترجمان نے بتایا کہ کانسٹیبل نے مشکل صورتحال کے باوجود اپنی ذمہ داری جاری رکھی اور مقابلے کے دوران غیر معمولی حوصلے اور بہادری کا مظاہرہ کیا۔
محمد خُماری ولد نور بخش گوادر کے سورابی وارڈ سے تعلق رکھتے تھے۔ وہ چھ بھائیوں اور ایک بہن میں سب سے چھوٹے تھے۔ ساتھی اہلکاروں کے مطابق وہ خوش اخلاق، نرم گفتار اور قابل اعتماد پولیس اہلکار تھے اور اپنی ذمہ داریوں کو خلوص اور لگن سے انجام دیتے تھے۔
بلوچستان پولیس نے کہا کہ ستارہ شجاعت کا اعزاز محمد خُماری کی قربانی اور فرض سے وابستگی کا قومی سطح پر اعتراف ہے۔ پولیس ترجمان کے مطابق صوبے میں مشکل سکیورٹی حالات کے باوجود فرائض انجام دیتے ہوئے کئی اہلکاروں نے جانوں کا نذرانہ پیش کیا، جن کی قربانیاں ہمیشہ یاد رکھی جائیں گی۔
پولیس نے شہید اہلکار کے اہل خانہ سے اظہار یکجہتی کرتے ہوئے ان کے لیے صبر اور مرحوم کے درجات کی بلندی کی دعا کی۔