پاکستان اور قطر کی ثالثی میں امریکہ اور ایران کے درمیان جاری مذاکرات میں اہم پیش رفت سامنے آئی ہے، جہاں فریقین نے اسلام آباد مفاہمتی یادداشت (اسلام آباد ایم او یو) سے متعلق امور پر مثبت پیش رفت کا اظہار کرتے ہوئے مذاکرات جاری رکھنے پر اتفاق کیا ہے۔
ترجمان دفتر خارجہ کے مطابق دوحہ میں قطری اور پاکستانی ثالثوں نے امریکی اور ایرانی مذاکراتی وفود سے الگ الگ ملاقاتیں کیں، جن میں لیک لوسرن سربراہی اجلاس کے بعد ہونے والی پیش رفت کا جائزہ لیا گیا۔ مذاکرات کے دوران اسلام آباد مفاہمتی یادداشت سے متعلق مختلف نکات پر تبادلہ خیال کیا گیا اور متعدد معاملات میں مثبت پیش رفت حاصل ہوئی۔
دفتر خارجہ کے بیان میں کہا گیا ہے کہ تمام فریقین نے اتفاق کیا ہے کہ مذاکرات کا سلسلہ آئندہ بھی جاری رکھا جائے گا تاکہ باقی ماندہ امور پر بھی اتفاق رائے پیدا کیا جا سکے۔ اس مقصد کے لیے اگلا مذاکراتی دور سابق ایرانی سپریم لیڈر کی نماز جنازہ اور تدفین کی تقریبات کے بعد جلد از جلد منعقد کیا جائے گا۔
پاکستانی حکام کے مطابق خطے میں امن و استحکام کے فروغ کے لیے سفارتی کوششیں جاری رہیں گی اور پاکستان مذاکراتی عمل کو کامیاب بنانے کے لیے اپنا تعمیری کردار ادا کرتا رہے گا۔ دفتر خارجہ نے کہا کہ پاکستان اور قطر کی مشترکہ ثالثی سے فریقین کے درمیان اعتماد سازی کو فروغ ملا ہے، جس سے تنازع کے پرامن حل کی امید مزید مضبوط ہوئی ہے۔
ماہرین کے مطابق اگر مذاکرات میں یہی پیش رفت برقرار رہی تو مستقبل میں امریکہ اور ایران کے درمیان کشیدگی میں کمی اور خطے میں امن و استحکام کے امکانات مزید روشن ہو سکتے ہیں۔ پاکستان نے ایک بار پھر اس عزم کا اعادہ کیا ہے کہ وہ اختلافات کے حل کے لیے بات چیت، سفارت کاری اور پرامن ذرائع کی حمایت جاری رکھے گا۔