بجلی کے بغیر نیا کولنگ نظام، اے سی کا مؤثر متبادل تیار

سعودی عرب کی King Abdullah University of Science and Technology کے ماہرین نے ایک جدید کولنگ نظام تیار کیا ہے جو بغیر بجلی کے کام کرتا ہے اور روایتی ایئر کنڈیشنر کا متبادل بن سکتا ہے۔ اس نظام کو “نیسکوڈ” نام دیا گیا ہے، جو نمک اور شمسی توانائی کے امتزاج سے ٹھنڈک پیدا کرتا ہے۔

یہ ٹیکنالوجی امونیم نائٹریٹ کے استعمال پر مبنی ہے، جو پانی میں حل ہونے پر حرارت کو جذب کرتا ہے اور ماحول کو ٹھنڈا کر دیتا ہے۔ تجربات کے دوران اس نظام نے صرف 20 منٹ میں درجہ حرارت کو 25 ڈگری سینٹی گریڈ سے کم کر کے 3.6 ڈگری تک پہنچا دیا، جو اسے دیگر نمک پر مبنی نظاموں کے مقابلے میں زیادہ مؤثر بناتا ہے۔

اس نظام کی خاص بات یہ ہے کہ اسے دوبارہ فعال کرنے کے لیے بجلی کی ضرورت نہیں ہوتی۔ شمسی توانائی کے ذریعے پانی کو بخارات میں تبدیل کیا جاتا ہے، جس کے بعد امونیم نائٹریٹ دوبارہ کرسٹل کی شکل میں آ کر استعمال کے قابل ہو جاتا ہے، یوں یہ عمل بار بار دہرایا جا سکتا ہے۔

ماہرین کے مطابق یہ ٹیکنالوجی گھروں، عمارتوں، خوراک کے تحفظ اور درجہ حرارت حساس اشیاء کی ذخیرہ کاری کے لیے استعمال ہو سکتی ہے، خاص طور پر ان علاقوں میں جہاں بجلی کی فراہمی محدود یا غیر مستحکم ہے۔

عالمی سطح پر بڑھتی ہوئی گرمی اور توانائی کی طلب کے پیش نظر یہ کم لاگت اور ماحول دوست حل لاکھوں افراد کے لیے مؤثر متبادل ثابت ہو سکتا ہے۔