سی پیک کے 45 منصوبے مکمل، مجموعی لاگت 25.61 ارب ڈالر رہی

حکومتی دستاویزات کے مطابق چین پاکستان اقتصادی راہداری (CPEC) کے تحت اب تک 45 منصوبے مکمل کیے جا چکے ہیں، جن پر مجموعی طور پر 25.61 ارب ڈالر لاگت آئی ہے۔ مکمل ہونے والے منصوبوں میں توانائی، انفراسٹرکچر اور اقتصادی و سماجی ترقی سے متعلق منصوبے شامل ہیں۔ دستاویزات کے مطابق سی پیک کے تحت مکمل کیے گئے منصوبوں میں 17 توانائی کے منصوبے، 15 انفراسٹرکچر کے منصوبے جبکہ 13 منصوبے اقتصادی اور سماجی ترقی کے شعبوں سے متعلق ہیں۔ توانائی کے شعبے میں مکمل ہونے والے اہم منصوبوں میں ساہیوال اور پورٹ قاسم کوئلے سے بجلی پیدا کرنے والے پاور پلانٹس شامل ہیں، جن کی مجموعی تکمیل پر 1.91 ارب ڈالر لاگت آئی۔ یہ منصوبے پاکستان کی توانائی کی ضروریات پوری کرنے اور صنعتی و معاشی سرگرمیوں کے لیے بجلی کی فراہمی بہتر بنانے میں اہم تصور کیے جاتے ہیں۔ سی پیک پاکستان اور چین کے درمیان اقتصادی تعاون کا ایک اہم منصوبہ ہے، جس کے تحت توانائی، سڑکوں، بنیادی ڈھانچے، صنعت، روزگار اور سماجی ترقی سمیت مختلف شعبوں میں سرمایہ کاری اور ترقیاتی منصوبے مکمل کیے گئے ہیں۔ حکومتی اعداد و شمار کے مطابق مکمل شدہ 45 منصوبے ملک میں بنیادی ڈھانچے اور اقتصادی سرگرمیوں کے فروغ میں سی پیک کے کردار کی عکاسی کرتے ہیں۔