وزیراعلیٰ بلوچستان میر سرفراز بگٹی نے سول ہسپتال کوئٹہ میں ایسڈ حملے کا نشانہ بننے والی ڈاکٹر مہنور نثار کی بروقت مدد کرنے والے عبدالرازق خلجی اور ان کے بھائی کے لیے سرکاری ملازمتوں کا اعلان کیا ہے۔ وزیراعلیٰ سیکریٹریٹ میں دونوں بھائیوں سے ملاقات کے دوران سرفراز بگٹی نے ان کی جرات، انسان دوستی اور بے لوث خدمت کو سراہا۔
وزیراعلیٰ نے خصوصی طور پر عبدالرازق خلجی کی تعریف کرتے ہوئے کہا کہ انہوں نے اپنی جان کی پروا کیے بغیر زخمی ڈاکٹر کی مدد کی، جو معاشرے کے لیے ایک مثبت مثال ہے۔ انہوں نے کہا کہ مشکل حالات میں دوسروں کی مدد کے لیے آگے بڑھنے والے نوجوان صوبے کا فخر ہیں۔
سرفراز بگٹی نے کہا کہ بلوچستان حکومت انسانی خدمت کے جذبے سے سرشار شہریوں کی حوصلہ افزائی جاری رکھے گی۔ دونوں بھائیوں نے سرکاری ملازمتوں کے اعلان اور خدمات کے اعتراف پر وزیراعلیٰ کا شکریہ ادا کیا۔