پاکستان اور زمبابوے کی خواتین کرکٹ ٹیموں کے درمیان چھ میچوں پر مشتمل وائٹ بال سیریز آج نیشنل بینک اسٹیڈیم کراچی میں شروع ہو رہی ہے۔ سیریز میں تین ون ڈے اور تین ٹی20 میچز شامل ہیں، جبکہ ون ڈے مقابلے آئی سی سی ویمنز چیمپئن شپ 2025-29 کا حصہ ہوں گے۔
ون ڈے میچز 4، 6 اور 9 مئی کو دوپہر ساڑھے تین بجے کھیلے جائیں گے، جبکہ ٹی20 سیریز کے میچز 12، 14 اور 15 مئی کو رات ساڑھے سات بجے شروع ہوں گے۔ پاکستان ویمنز ٹیم کی قیادت فاطمہ ثنا کریں گی جبکہ اسکواڈ میں ایک نئی کھلاڑی مومنہ ریاست بھی شامل ہیں۔
پاکستانی ٹیم اس وقت آئی سی سی ویمنز چیمپئن شپ پوائنٹس ٹیبل پر دو پوائنٹس کے ساتھ پانچویں نمبر پر موجود ہے۔ یہ سیریز قومی ٹیم کے لیے نہ صرف چیمپئن شپ میں بہتر آغاز کا موقع ہوگی بلکہ آئندہ آئی سی سی ویمنز ٹی20 ورلڈ کپ کی تیاریوں میں بھی اہم کردار ادا کرے گی، جو جون اور جولائی میں انگلینڈ اور ویلز میں منعقد ہوگا۔
کپتان فاطمہ ثنا نے کہا کہ ہوم گراؤنڈ پر کھیلنا ٹیم کے اعتماد میں اضافہ کرتا ہے اور کھلاڑی اپنی ذمہ داریوں سے بخوبی آگاہ ہیں۔ انہوں نے کہا کہ بولنگ ٹیم کی طاقت رہی ہے تاہم بیٹنگ میں مزید تسلسل لانے پر توجہ دی جا رہی ہے تاکہ اجتماعی کارکردگی بہتر بنائی جا سکے۔
زمبابوے ویمنز ٹیم کی کپتان نومویلو سیباندا نے اس دورے کو تاریخی قرار دیتے ہوئے کہا کہ پاکستان کا پہلا دورہ ان کی ٹیم کے لیے اہم موقع ہے اور کھلاڑی مختلف کنڈیشنز میں کھیلنے کے لیے پُرجوش ہیں۔
پاکستان کے 15 رکنی اسکواڈ میں فاطمہ ثنا، عالیہ ریاض، منیبہ علی، سدرہ امین، ڈیانا بیگ، نشرہ سندھو، صدف شمس اور دیگر کھلاڑیاں شامل ہیں جبکہ ٹیم مینجمنٹ میں وہاب ریاض بطور مینٹور اور ہیڈ کوچ فرائض انجام دے رہے ہیں۔