: وزارت مذہبی امور نے اعلان کیا ہے کہ حج 2027 کے لیے رجسٹریشن مہم کے ابتدائی تین روز کے دوران 80 ہزار سے زائد پاکستانیوں نے آن لائن رجسٹریشن مکمل کر لی ہے، جبکہ آئندہ حج آپریشن کو مکمل طور پر پیپر لیس اور ڈیجیٹل نظام کے تحت چلانے کا فیصلہ کیا گیا ہے۔
وزارت کے مطابق رجسٹریشن کا عمل سرکاری اور نجی حج اسکیموں کے لیے جاری رہے گا، جبکہ حج اخراجات اور دیگر انتظامی تفصیلات دوسرے مرحلے میں جاری کی جائیں گی۔ تمام رجسٹریشن نیشنل انفارمیشن ٹیکنالوجی بورڈ کے تیار کردہ جدید آن لائن حج مینجمنٹ سسٹم کے ذریعے کی جا رہی ہے۔
اعداد و شمار کے مطابق سب سے زیادہ رجسٹریشن کراچی سے ہوئی، جس کے بعد لاہور اور اسلام آباد روانگی کے اہم مراکز رہے۔ اب تک رجسٹر ہونے والے افراد میں تقریباً 47 ہزار مرد اور 33 ہزار خواتین شامل ہیں، جبکہ زیادہ تر درخواست گزاروں کی عمر 25 سے 50 سال کے درمیان ہے۔
وزارت مذہبی امور نے بتایا کہ رجسٹرڈ عازمین میں تقریباً ایک ہزار پی ایچ ڈی، 17 ہزار ماسٹرز، 21 ہزار بیچلرز اور 12 ہزار انٹرمیڈیٹ تعلیم یافتہ افراد بھی شامل ہیں۔ حکومت کا کہنا ہے کہ حج 2027 کا پورا آپریشن جدید ڈیجیٹل نظام کے تحت شفاف، تیز اور مؤثر انداز میں مکمل کیا جائے گا۔