کوئٹہ: بلوچستان اسمبلی نے ایران اور امریکہ کے درمیان جنگ بندی میں پاکستان کے کردار کو سراہتے ہوئے متفقہ قرارداد منظور کر لی۔
قرارداد صوبائی وزیر داخلہ میر ضیاء اللہ لانگوو نے پیش کی، جس میں پاکستان کی بروقت، متوازن اور مؤثر سفارتی کوششوں کو سراہا گیا۔
ایوان نے وزیر اعظم میاں محمد شہباز شریف اور فیلڈ مارشل سید عاصم منیر کی قیادت کو خراج تحسین پیش کرتے ہوئے کہا کہ ان کی حکمت عملی سے عالمی امن کے لیے راستہ ہموار ہوا۔
قرارداد میں کہا گیا کہ پاکستان نے ایک ذمہ دار اور امن پسند ریاست کے طور پر عالمی قیادت کی توجہ مبذول کروا کر بڑے تنازع کو جنگ میں تبدیل ہونے سے روکا۔
ارکان اسمبلی نے کہا کہ پاکستان کی ثالثی سے خطے میں امن اور استحکام کو فروغ ملا اور یہ سفارتی کامیابی ملک کے لیے باعث فخر ہے۔
اجلاس میں مختلف وزراء اور اراکین نے خطاب کرتے ہوئے پاکستان کی سیاسی و عسکری قیادت کی کوششوں کو تاریخی اور قابلِ تحسین قرار دیا اور مذاکرات کی کامیابی کے لیے نیک خواہشات کا اظہار کیا۔