وزیراعلیٰ کا وژن رنگ لانے لگا — بی ایس ڈی اے آئی کے تحت بلوچستان میں اربوں کے ترقیاتی منصوبے، تعلیم و صحت کے شعبوں میں بڑی تبدیلی

کوئٹہ: وزیراعلیٰ بلوچستان میر سرفراز بگٹی کے وژن کے تحت صوبے میں پائیدار اور جامع ترقی کا عمل تیز ہو گیا ہے، جہاں بلوچستان سسٹینیبل ڈویلپمنٹ انیشیٹو (بی ایس ڈی اے آئی) کے ذریعے عوامی خدمات میں نمایاں بہتری لائی جا رہی ہے۔

حکام کے مطابق اس پروگرام کے تحت صوبے بھر میں اسکولوں، کالجوں اور بنیادی صحت مراکز کی بڑے پیمانے پر بحالی کا عمل جاری ہے، جس کا مقصد تعلیم اور صحت کی سہولیات کو جدید اور مؤثر بنانا ہے۔

بی ایس ڈی اے آئی کے تحت 2,147 جاری ترقیاتی منصوبوں پر مجموعی طور پر 27 ارب روپے خرچ کیے جا رہے ہیں، جن سے تقریباً 1 کروڑ 49 لاکھ افراد مستفید ہوں گے۔

سرکاری ذرائع کے مطابق پہلے مرحلے میں شامل 278 منصوبوں میں سے 75 فیصد مکمل کیے جا چکے ہیں، جو تیز رفتار عملدرآمد اور بہتر نگرانی کے نظام کی عکاسی کرتا ہے۔

حکام کا کہنا ہے کہ یہ منصوبہ نہ صرف بنیادی سہولیات کی بہتری میں مددگار ثابت ہو رہا ہے بلکہ صوبے میں ترقی، روزگار اور عوامی فلاح کے نئے مواقع بھی پیدا کر رہا ہے۔