واشنگٹن: وفاقی وزیر خزانہ محمد اورنگزیب نے کہا ہے کہ پاکستان مشرقِ وسطیٰ کی صورتحال پر گہری نظر رکھے ہوئے ہے اور اگر ایران سے متعلق تنازع طویل ہوا تو اس کے پاکستان سمیت عالمی معیشت پر سنگین مالی اثرات مرتب ہو سکتے ہیں۔
سی این بی سی کو دیے گئے انٹرویو میں انہوں نے کہا کہ پاکستان کی قیادت نے حالیہ دنوں میں امریکا اور ایران کے درمیان سفارتی رابطے بحال کرانے کے لیے “انتہائی سنجیدہ کوششیں” کی ہیں۔
انہوں نے کہا کہ یہ کوششیں نہ صرف امریکا بلکہ ایران کی قیادت نے بھی تسلیم کی ہیں، اور اس وقت مذاکراتی عمل کسی نہ کسی شکل میں جاری ہے۔
وزیر خزانہ کے مطابق خطے میں جاری کشیدگی عالمی مالیاتی استحکام کے لیے خطرہ بن سکتی ہے، اس لیے بات چیت اور سفارت کاری ہی واحد راستہ ہے۔