۹ اپریل ۲۰۲۶
کوئٹہ: بلوچستان حکومت نے صوبے بھر میں ایک ماہ کے لیے مفت گاڑیوں اور موٹر سائیکلوں کی رجسٹریشن مہم شروع کر دی ہے۔
ڈائریکٹر جنرل ایکسائز اینڈ ٹیکسیشن محمد ایوب ہزارہ کے مطابق اس مہم کے تحت تمام ایکسائز دفاتر میں عوام کی سہولت کے لیے خصوصی ڈیسک قائم کیے گئے ہیں جو ہفتے کے ساتوں دن، بشمول جمعہ، ہفتہ اور اتوار، فعال رہیں گے۔
انہوں نے بتایا کہ یہ منصوبہ وزیراعلیٰ بلوچستان میر سرفراز بگٹی کو اس وقت پیش کیا گیا جب پیٹرولیم قیمتوں میں اضافے کے بعد شہریوں کو سہولت دینے کی ضرورت محسوس کی گئی۔
حکام کے مطابق صوبے میں کئی گاڑی مالکان نے اپنی گاڑیاں اور موٹر سائیکلیں اپنے نام پر رجسٹر نہیں کرائیں تھیں، جس کی وجہ سے وہ مجوزہ فیول سبسڈی کے لیے اہل نہیں تھے۔
وزیراعلیٰ کی منظوری کے بعد یہ ایک ماہ کا مفت رجسٹریشن پیکج ۶ اپریل سے شروع کر دیا گیا ہے۔
اس اسکیم کے تحت شہریوں کو صرف اسمارٹ کارڈ اور نمبر پلیٹ کی فیس ادا کرنا ہوگی، جس میں اسمارٹ کارڈ کی فیس ۲۲۵۰ روپے اور نمبر پلیٹ کی فیس ۱۸۰۰ روپے مقرر کی گئی ہے۔