اسلام آباد، 14 اپریل (ویب ڈیسک): پاکستان نے اسپیشل انویسٹمنٹ فسیلیٹیشن کونسل (SIFC) کے تحت پاکستان نیشنل میڈیکل ٹورزم انیشی ایٹو کا باقاعدہ آغاز کر دیا ہے، جس کا اعلان اسلام آباد میں پاکستان ایسوسی ایشن آف پلاسٹک سرجنز کی 30ویں سالانہ بین الاقوامی کانفرنس کے دوران کیا گیا۔
تفصیلات کے مطابق یہ کانفرنس کنفرنس سیکریٹری پروفیسر ڈاکٹر عبدالخالق ملک کی زیرِ قیادت منعقد ہوئی، جو پمز میں پلاسٹک اینڈ برن سرجری کے سربراہ ہیں۔ تقریب میں 400 سے زائد مندوبین اور 12 بین الاقوامی ماہرین نے شرکت کی، جو علاقائی چیلنجز کے باوجود ایک بڑی پیش رفت قرار دی گئی۔
کانفرنس کے تین روزہ سائنسی پروگرام میں تحقیقی مقالہ جات، جدید لیکچرز اور لائیو سرجیکل ورکشاپس شامل تھیں جن کا مقصد طبی شعبے میں پیشہ ورانہ تربیت اور جدید مہارتوں کو فروغ دینا تھا۔
اس کے علاوہ نان اِنویسیو جمالیاتی طریقۂ علاج سے متعلق خصوصی سیشن بھی رکھا گیا جس میں بوٹوکس، فلرز اور فیٹ گرافٹنگ جیسے جدید طریقہ ہائے علاج پر عملی تربیت فراہم کی گئی۔
حکام کے مطابق یہ اقدام پاکستان کو خطے میں طبی سیاحت (میڈیکل ٹورزم) کے مرکز کے طور پر متعارف کرانے اور غیر ملکی مریضوں کو جدید طبی سہولیات فراہم کرنے کی جانب ایک اہم پیش رفت ہے۔