پاکستان اور عمان نے گوادر اور صحار بندرگاہوں کو بہن بندرگاہیں قرار دینے کے لیے طویل عرصے سے زیر غور معاہدے کو حتمی شکل دینے کی کوششیں تیز کردی ہیں۔ گوادر پورٹ اتھارٹی کے چیئرمین نور الحق بلوچ کے مطابق دونوں ممالک کے درمیان مفاہمتی یادداشت پر دستخط کے لیے تین سال سے عمل جاری ہے اور اب اسے رواں سال مکمل کرنے کا ہدف مقرر کیا گیا ہے۔ ان کے مطابق عمان کی صحار اور صلالہ بندرگاہیں گوادر کے لیے قدرتی شراکت دار ہیں اور مجوزہ معاہدے کا بنیادی مقصد تجارت کو فروغ دینا اور دونوں بندرگاہوں کے درمیان روابط مضبوط بنانا ہے۔ گوادر چین پاکستان اقتصادی راہداری کے مرکز میں واقع ہونے کے باعث دونوں ممالک کے لیے مشترکہ تجارتی مواقع پیدا کرسکتا ہے۔ معاہدے کی حتمی منظوری کے بعد دونوں بندرگاہوں کے درمیان تجارتی تعاون، عملی رابطہ کاری اور مختلف مواقع میں شراکت بڑھنے کی توقع ہے۔ پاکستان شپ ایجنٹس ایسوسی ایشن کے چیئرمین محمد اے راجپر کے مطابق بہن بندرگاہوں کے انتظام میں تکنیکی معلومات کا تبادلہ، بندرگاہی اہلکاروں کی باہمی تربیت، جہاز رانی کمپنیوں کے لیے مشترکہ رعایتیں اور ایک دوسرے کے جہازوں کو ترجیح دینا شامل ہوسکتا ہے۔ گوادر پورٹ اتھارٹی کے مطابق یہ اقدام خلیجی ممالک کے ساتھ پاکستان کے تجارتی روابط اور گوادر کی علاقائی بحری تجارت میں کردار بڑھانے کی طویل مدتی حکمت عملی کا حصہ ہے
27°C
Sunny