ایاز صادق کی کوئٹہ میں وزیراعلیٰ بلوچستان سرفراز بگٹی سے ملاقات، وفاقی تعاون کی مکمل یقین دہانی

قومی اسمبلی کے اسپیکر سردار ایاز صادق نے کوئٹہ میں وزیراعلیٰ بلوچستان میر سرفراز بگٹی سے ملاقات کی، جس میں صوبائی کابینہ کے ارکان، حکومتی و اپوزیشن اراکین اور دیگر سیاسی نمائندے بھی شریک ہوئے۔ ملاقات میں بلوچستان کی ترقی، عوامی شکایات کے ازالے، وفاق اور صوبے کے درمیان رابطہ مضبوط بنانے اور جمہوری و پارلیمانی روایات کے فروغ سمیت باہمی دلچسپی کے مختلف امور پر تبادلہ خیال کیا گیا۔ وزیراعلیٰ سرفراز بگٹی نے ایاز صادق کی کوئٹہ آمد کو بلوچستان کے عوام کے لیے باعث مسرت اور اعزاز قرار دیا اور کہا کہ بلوچستان سب کا صوبہ ہے جہاں جمہوری اقدار، سیاسی برداشت، باہمی احترام اور حکومت و اپوزیشن کے درمیان تعمیری روابط کی مضبوط روایات موجود ہیں۔ ایاز صادق نے کہا کہ بلوچستان کے ساتھ ان کا تعلق سیاسی وابستگی سے بڑھ کر خاندانی اور جذباتی نوعیت کا ہے۔ انہوں نے صوبے کے عوام کی مہمان نوازی اور خلوص کو سراہتے ہوئے کہا کہ قومی اسمبلی بلوچستان کے منتخب نمائندوں اور عوام کے مسائل کے حل کے لیے ہر ممکن تعاون فراہم کرے گی۔ اسپیکر نے بلوچستان کو پاکستان کا اہم ترین صوبہ قرار دیتے ہوئے کہا کہ صوبے کی ترقی اور خوشحالی پورے ملک کی ترقی اور استحکام سے براہ راست منسلک ہے۔ دونوں رہنماؤں نے مشاورت، مکالمے اور سیاسی تعاون مزید مضبوط بنانے پر اتفاق کیا۔