سی ڈی ڈبلیو پی نے 60 ارب روپے سے زائد مالیت کے پانچ ترقیاتی منصوبوں کی منظوری دے دی

 مرکزی ترقیاتی ورکنگ پارٹی نے 60 ارب روپے سے زائد مالیت کے پانچ ترقیاتی منصوبوں کی منظوری اور سفارشات دے دی ہیں، جن میں میرانی ڈیم سے گوادر شہر تک پانی کی فراہمی کا اہم منصوبہ بھی شامل ہے۔ منصوبہ بندی کے وزیر احسن اقبال کی زیر صدارت اجلاس میں تین منصوبوں کو تقریباً 11 ارب 70 کروڑ روپے کی لاگت سے منظور کیا گیا جبکہ دو بڑے منصوبے تقریباً 48 ارب 54 کروڑ روپے کی لاگت کے ساتھ حتمی منظوری کے لیے قومی اقتصادی کونسل کی انتظامی کمیٹی کو بھجوا دیے گئے۔ گوادر پانی فراہمی منصوبے کے تحت میرانی ڈیم سے 125 کلومیٹر طویل پائپ لائن کے ذریعے گوادر کو پانی فراہم کیا جائے گا۔ منصوبہ بندی کمیشن نے بلوچستان حکومت کی جانب سے تجویز کردہ 29 ارب روپے کی لاگت کم کرکے تقریباً 23 ارب 82 کروڑ روپے کرنے کی سفارش کی، جس سے 5 ارب 23 کروڑ روپے سے زائد کی بچت ہوگی۔ وزیر احسن اقبال نے گوادر میں گندے پانی کی صفائی کے نظام پر بھی مطالعہ شروع کرنے کی ہدایت دیتے ہوئے کہا کہ سمندر کو سیوریج سے آلودہ ہونے سے بچانا ضروری ہے۔ اجلاس میں گلگت میں میڈیکل اور نرسنگ کالج، اسلام آباد میں نیشنل ڈیفنس یونیورسٹی کیمپس اور ضلع اورکزئی میں 53 کلومیٹر طویل سڑک کے منصوبے بھی منظور کیے گئے۔