گورنر بلوچستان کی لاس اینجلس میں سرمایہ کاری کے مواقع پر پاکستانی نژاد امریکی شخصیات سے گفتگو

لاس اینجلس میں گورنر بلوچستان جعفر خان مندوخیل کے اعزاز میں ایک خصوصی عشائیہ دیا گیا، جس میں سفارتی، سیاسی، کاروباری اور پاکستانی نژاد امریکی کمیونٹی کی نمایاں شخصیات نے شرکت کی۔ عشائیے کا اہتمام ڈاکٹر عمران شریف اور عترت شریف نے کیا۔ تقریب میں پاکستان کے قونصل جنرل سراج خان، امریکی کانگریس کے رکن لو کوریہ، چینی قونصل جنرل چن لن، میکسم گروپ کے چیف ایگزیکٹو افسر عزیر حسن اور دیگر کاروباری و کمیونٹی نمائندے شریک ہوئے، جبکہ پاکستانی نژاد امریکی تاجر، سرمایہ کار اور پاک فوڈز کے چیف ایگزیکٹو تنویر احمد بھی موجود تھے۔ گورنر جعفر خان مندوخیل نے شرکا سے گفتگو کے دوران بلوچستان میں سرمایہ کاری کے مواقع، کاروباری امکانات اور صوبے کی معاشی ترقی میں بیرون ملک مقیم پاکستانیوں کے ممکنہ کردار پر تفصیلی تبادلہ خیال کیا۔ انہوں نے پاکستانی نژاد امریکی سرمایہ کاروں اور بلوچستان میں موجود کاروباری مواقع کے درمیان مضبوط روابط قائم کرنے کی ضرورت پر زور دیا۔ گورنر نے ڈاکٹر عمران شریف کی میزبانی پر شکریہ ادا کیا اور تنویر احمد کی خدمات اور تعاون کو سراہا۔ عشائیے میں پاکستان کی معاشی ترقی، سرمایہ کاری، کاروباری تعاون اور اوورسیز پاکستانی کمیونٹی کے کردار سے متعلق مختلف امور پر تبادلہ خیال کیا گیا۔ تقریب کو بلوچستان میں سرمایہ کاری اور اقتصادی سرگرمیوں کے فروغ کے لیے روابط بڑھانے کی اہم کوشش قرار دیا گیا۔