وزیراعلیٰ بلوچستان سرفراز بگٹی نے کہا ہے کہ صوبے میں سرگرم دہشت گرد نیٹ ورکس آخری مرحلے میں ہیں اور ریاست ان کے مکمل خاتمے تک بھرپور کارروائیاں جاری رکھے گی۔ انہوں نے یہ بات ڈھاڈھ واقعے میں جاں بحق ہونے والے بزنس مین علی مرتضیٰ کے اہل خانہ سے ملاقات کے بعد میڈیا سے گفتگو کرتے ہوئے کہی۔
وزیراعلیٰ نے مرحوم کے گھر جا کر اہل خانہ سے تعزیت کی اور حکومت کی جانب سے مکمل تعاون کی یقین دہانی کرائی۔ انہوں نے اعلان کیا کہ بلوچستان حکومت مرحوم کی بیٹیوں کی تعلیم اور فلاح و بہبود کے تمام اخراجات برداشت کرے گی تاکہ خاندان کو کسی مالی مشکل کا سامنا نہ کرنا پڑے۔
سرفراز بگٹی نے کہا کہ شہریوں کی جان و مال کا تحفظ حکومت کی اولین آئینی ذمہ داری ہے اور اس حوالے سے کسی بھی قسم کی غفلت برداشت نہیں کی جائے گی۔ انہوں نے کہا کہ صوبے میں امن و امان کی صورتحال کو بہتر بنانے کے لیے سیکیورٹی ادارے مسلسل متحرک ہیں اور دہشت گردی کے مکمل خاتمے کے لیے مربوط کارروائیاں جاری ہیں۔
وزیراعلیٰ نے سوشل میڈیا پر واقعے سے متعلق پھیلائی جانے والی غلط معلومات اور گمراہ کن بیانیے پر بھی تنقید کی اور کہا کہ ایسے انفرادی واقعات کو بڑھا چڑھا کر پیش کرنا درست نہیں کیونکہ اس سے مجموعی صورتحال کے بارے میں غلط تاثر پیدا ہوتا ہے۔ ان کے مطابق بلوچستان کی بڑی شاہراہوں پر روزانہ ہزاروں لوگ محفوظ سفر کرتے ہیں۔
انہوں نے عوام سے اپیل کی کہ وہ غیر مصدقہ خبروں پر اعتماد کرنے کے بجائے مستند معلومات پر بھروسہ کریں۔ وزیراعلیٰ نے کہا کہ حکومت امن کے قیام، عوامی تحفظ اور استحکام کے لیے اپنی کوششیں جاری رکھے گی اور کسی بھی قسم کی دہشت گردی کو برداشت نہیں کیا جائے گا۔
