گوادر میں تین روزہ “گوادر عید سیونگز بازار” کا افتتاح کر دیا گیا ہے جس کا مقصد خواتین کی معاشی خودمختاری کو فروغ دینا اور ان کی کاروباری صلاحیتوں کو اجاگر کرنا ہے۔ افتتاحی تقریب مقامی دکاندار مسی پیرانی نے ربن کاٹ کر کی۔
تقریب میں آر سی ڈی سی کی قیادت سمیت صدر عبدالغنی بلوچ اور دیگر عہدیداروں نے شرکت کی جبکہ بڑی تعداد میں خواتین نے بھی حصہ لیا۔ منتظمین کے مطابق یہ بازار 22 سے 24 مئی 2026 تک سید ہاشمی آڈیٹوریم میں جاری رہے گا۔
اس بازار کی خاص بات یہ ہے کہ یہ مکمل طور پر خواتین کے لیے مخصوص ماحول فراہم کرتا ہے، جہاں تمام اسٹالز خواتین کے لیے مختص ہیں اور صرف خواتین خریداروں کو داخلے کی اجازت ہے۔ یہاں کپڑے، کاسمیٹکس، زیورات، دستکاری، خوراک، مصالحہ جات اور پرفیوم سمیت مختلف اشیاء پیش کی جا رہی ہیں۔
منتظمین کا کہنا ہے کہ اس اقدام کا مقصد عید سے قبل خواتین کاروباری افراد کی معاونت کرنا اور گوادر میں مقامی سطح پر پائیدار معاشی سرگرمیوں کو فروغ دینا ہے۔